ناصر عبدالرحمن يكتب: الوهم

كاتب صحفي

صنعة النصابين الكدب، يمشى بموهبة غيره، وبيلبس من جيب غيره، دايماً بينافق، فاكر إنه ذكى، والإحساس نعمة مش فيه، اللى يملكه شوية نفاق وعطن على قلة أخلاق، وتشكيلة مصالح منزوعة الكرامة، بأقنعة نحتها الوهم، بجناح طائر بظل خفاش، الوهم محل خربان بيافطة نيون، إوعى فى يوم تسمح لوهمك يخنقك ويستعبدك، دا مهما كان رذل ما تبقاش أنت غبى، الوهم بيورط الأبطال، عين الوهم عمية مالهاش بصيرة، خداعه بألوان كتيرة، الصبح نور فايق، والبرد بيكتف الساكت، إن كان الوهم جبل، افتكر إنه فى يوم زايل، ولو كنت من الوهم خايف، خاف على قلبك أكتر، القلب مددك ومستقبلك، من غير قلبك مالكش عزيز، انفض الغبار وامسح وشك واتوضا، من غير قلبك ها تبقى يتيم، تعرف الزرع لما يطرح، الشمس لما تشرق، القمر لما يبتسم للحبايب، كلها وشوشة ونس من قلبك.

اللى بينك وبين السعادة خطوة إنك تدوس على وهمك، لو صرخ فى طريقك خوفه، سلاحك ضده ها يخوفه، مهما كان الخوف لابس حديد، ولا لابس فضة، ولا راكب وهم بسور وبوابة، اكسر الوهم بنظرة، وخوف الكداب بالندا، أيون كده هو كده، أصحاب الوهم كتير، عايشين على خوفك، بيكبروا ويتنجموا، وبيخضروا ويحمروا بالوهم، أكلهم وهمك وشربهم وهمك، نجاحهم إنك تتحبس فى وهمك، وتتصور إن الوهم كل الدنيا، وتعتقد إنك ضعيف وإنهم سطوة، علشان يضعف مددك وتقل عزمتك، وتنسى إن جواك سر، مهما كانوا ضدك ومهما كانوا كتيييير عددهم كتيييير، خلى قلبك يدلك، ينور لك صراطك، دول مهما اتكتروا وهم، مهما اتآمنوا ومضوا بدمهم الفاسد على سمك، مهما قتلوا فيك فطرتك وإنسانيتك، هما كده تمنهم كده، يقتلوا الأطفال ويحرقوا البيوت ويدفنوا الحقايق، فاكرين نفسهم دم أزرق، ما يعرفوش إنهم مهما اتصنعوا عمرهم ما هيبقوا حقايق، عمرك شوفت صنم له روح، لازم تعرف إنك إنت الخليفة إنك الحقيقة وإنك المحبوب، وإنك ممدود بنظرة، وإن الحب اللى جواك حامى وإنه جوهرتك الثمينة، وإن الفرق بينك وبينهم قلب فيه روح.