«انزلوا» للمواطنين: «يا شعب كمّل جميلك»

11:22 ص | الجمعة 16 أكتوبر 2015

شباب غير منتمٍ إلى تيارات سياسية أو أحزاب، قرروا تكوين فريق «مصر تنتخب البرلمان»، لتوعية المواطنين من الفئات المختلفة، بأهمية المشاركة فى انتخابات برلمان 2015، تحت شعار «انزلوا يا مصريين»، الدعوة التى لاقت قبولاً بين قطاع واسع من المواطنين، بينما أثارت استياء بعض الذين لا يرون أهمية لمجلس النواب المقبل.

{long_qoute_1}

الدور الذى يقوم به الفريق، يعتمد على الجهود الذاتية، جولات يومية قرروا القيام بها فى عدة مناطق متفرّقة، دون التأثير على وجهة نظرهم لاختيار ناخب بعينه، حسب أحمد حساب، أحد مؤسسى الفريق: «إحنا فكّرنا نعمل حاجة جديدة عشان نقدر نوصل للناس بسرعة، فقررنا ننزل الشارع كل يوم حتى التصويت»، الأماكن الشعبية ذات الكثافة السكانية من مستهدفات الحملة: «بننزل الأماكن البسيطة وعملنا خريطة للحملة بمجموعات شبابية غير حزبية، نعدى على الناس فى القهاوى والمحلات والمواصلات العامة زى القطارات، ونتكلم معاهم عن أهمية تصويتهم فى البرلمان»، مستدركاً: «بنقول للشعب.. كمّل جميلك وكمّل الطريق». ردود فعل واسعة بين المواطنين حول المبادرة، وغيرها من دعوات المشاركة فى الانتخابات، عم «أيمن» بائع أقمشة، أكد حرصه على الإدلاء بصوته، فيقول: «الشباب مفيش أحسن منهم، وفكرة اللف على الناس فى الشارع عشان الكل يشارك وينتخب ده مجهود كبير عليهم، وهما حققوه بشكل محترم»، بترحاب شديد استقبل دعوة شابين يحملان مطبوعات محفّزة على المشاركة، حسب قوله: «دخلوا علىّ فى المحل، وفهّمونى بكل بساطة، أنه لازم أشارك عشان أكون السبب فى التغيير للأفضل، وفيه ناس كانوا مش فاهمين حاجة وهما يفضلوا وراهم لحد ما يفهموهم أهمية التصويت فى البرلمان اللى من مصلحتنا كلنا كمصريين يبقى موجود علشان مؤسسات الدولة تكتمل ويبقى فيه ناس بتراقب الحكومة وتدرس القوانين».