مدرسة بالمعادى تستقبل تلاميذها بـ«حاسبوا.. البلاعة مفتوحة»

07:53 م | الجمعة 16 أكتوبر 2015

الطابور الصباحى أوشك على الانتهاء، يهمّ الطلاب لحمل حقائبهم بعد أداء تحية العَلم فى الاتجاه نحو الصفوف، وصوت قادم من بعيد ينبههم: «خلوا بالكم، البلاعة مفتوحة».

داخل أروقة مدرسة الفيروز بالمعادى بدأت رحلة أمانى يحيى، ولى أمر أحد الطلاب بالمدرسة، فى محاولات لتصوير فيديو موثَّق بالصوت والصورة، يحمل مشاهد من الإهمال الذى فوجئت به فى فناء المدرسة الضيق لأول يوم دراسة، «المدرسة كان فيها إهمال بس مش للدرجة دى، فيه أكتر من بلاعتين مفتوحتين من غير أى حاجة تسدهم، والعيال رايحة جاية عليهم، وممكن يقعوا فيهم من غير وعى، ده غير الزبالة اللى منتشرة فى الحوش بشكل مش طبيعى». المشهد لم يلفت انتباه أحد، يبدو أنه متكرر مع بداية كل عام، حتى إن الطلبة لم يبدوا رفضهم له، ربما لصغر سنهم، فجميعهم فى المرحلة الابتدائية، ومدرسة «الفيروز» قد تكون من أفضل المدارس الحكومية فى المنطقة، حسب «أمانى»، فتقول: «ابنى أول سنة ليه فى المدرسة، واتصدمت لما دخلت وشُفت منظر المعدات والبلاعات مفتوحة جنبها ولا كأن فيه طلاب خايفين على حياتهم، أنا صحيح مش معايا فلوس أدخّل ابنى مدرسة خاصة لأننا بوابين فى المنطقة، لكن ما اقدرتش أسكت على الإهمال ده وقررت أصوره عشان دى كارثة ما يتسكتش عليها، بعد ما دخلت للمديرة وقالت لى دى تصليحات بسيطة وما فيهاش مشكلة».

«الصيانة موجودة فى بعض المدارس منذ بداية العام الدراسى، ولا تشكل خطراً على حياة التلاميذ، وتفعيل إجراءات الأمانة والسلامة»، قالها مصدر مسئول بهيئة الأبنية التعليمية، طلب عدم ذكر اسمه، مؤكداً أن مدرسة الفيروز من ضمن المدارس الخاضعة للصيانة، لكن «أول مرة أعرف موضوع البلاعة المفتوحة»، وأضاف: «هنشكّل لجنة، ولو ثبت صحة البلاغ هنحوّل مدير المدرسة وكل مسئول للتحقيق، لأن حياة التلاميذ أمانة فى رقبتنا».