وحدات طب الأسرة فى المعادى: حضر «النسل».. وغاب «التنظيم»

10:52 م | الخميس 22 أكتوبر 2015

5 أشهر عجاف، أعقبت ولادتها الأخيرة، لم تعرف «أم يوسف» كيف انقضت دون وجود حمل آخر، فى سعيها وراء استخدام وسيلة لمنع الحمل، أنفقت السيدة الثلاثينية جهداً ومالاً، يكفى تلك الزيارة الشهرية التى اختارت لها منتصف الشهر، لوحدات طب الأسرة، بحثاً عن طبيبة تفيدها بالأنسب وتتيح لها ما حرمتها الإمكانيات منه، لكن الزيارة تنقضى دون نفع أو طائل، فكل وحدة طب أسرة دخلتها فى المعادى، خرجت منها بإجابة واحدة من موظفة الصحة: «معلش الدكتورة مجتش النهارده، تعالى الشهر اللى جاى فى نفس الميعاد». لم تصدق السيدة نفسها، دار السؤال بخلدها «معقول ده كان يحصل أيام سوزان مبارك؟»، تنسب الأمر لصاحبته، إذ ترى فى قرينة الرئيس الأسبق المحرك الأساسى فى حملات تنظيم الأسرة، والتى اختفت إعلاناتها من التليفزيون من قبل حتى سقوط نظام مبارك وتوارى زوجته عن الأنظار، تندهش أم يوسف «هى كانت عاملة الإعلانات والحملات دى من جيبها، ولا ده من جيب البلد، فين بقى الاهتمام اللى كان موجود أيامها؟».

وتتابع: «من بعد الأربعين وأنا بروح الصحة وفى كل مرة الدكتورة مش موجودة، وفى تانى شهر رحت صحة صقر قريش قالوا لى الدكتورة فى الطريق وفضلت من 9 الصبح لحد ميعاد ما قفلوا وماجاتش وطلعوا بيضحكوا علينا، عشان يسكتونا فى الآخر بحبوب منع الحمل اللى بيدوهالى كل مرة ويحصل حمل عليها، بقيت مرعوبة دلوقتى كل ما جوزى يقرب منى خايفة يحصل حمل وبينا مشاكل». بين وحدات طب الأسرة الأربع الموجودة فى المعادى، خاضت سحر أحمد التجربة نفسها «بقالى شهرين أعدى على صحة صقر قريش ملقيش دكاترة، ودلوقتى عدى عليا 3 شهور من الولادة فقررت أروح كل الوحدات الصحية اللى فى المنطقة عندنا، رحت صقر الميه كانت قاطعة وقالوا لى تعالى بكره، وفى صحة ميدان التعاون مفيش دكاترة وفى العرب بتتصلح ومافيهاش إلا كشوفات، وفى الآخر رحت صحة البساتين قالوا لى الدكتورة موجودة فضلت أستناها ودخل قبلى 3 ستات وأول ما جه عليا الدور قالولى اللمبة اللى بنركب عليها ضربت، تعالى مرة تانية»، المشهد برمته أثار حفيظة د. خالد مجاهد، القائم بأعمال المتحدث الرسمى لوزارة الصحة، أكد أنه لا يوجد تهاون حال تقصير أطباء وحدات طب الأسرة، موضحاً أنه فى خلال الأيام المقبلة سيشكل لجنة من مديرية الشئون الصحية بالقاهرة لزيارة وحدات الصحة بالمعادى تحديداً «اللجنة هتقوم بعمل تقرير عن تشغيل الوحدة وحالتها ووجود الأطباء فيها، ولو وجدنا تقصير هيكون فيه عقاب رادع».