ناقد فني يُشيد بمشهد الدفن في مسلسل حكاية نرجس: ممتع وسلس
ناقد فني يُشيد بمشهد الدفن في مسلسل حكاية نرجس: ممتع وسلس
أشاد الناقد الفني أندرو محسن بمشهد الدفن في الحلقة 5 من مسلسل حكاية نرجس، وذلك في منشور عبر حسابه الرسمي على فيس بوك.
وقال: «أنا حبيت كل حاجة في المشهد ده، نهاية الحلقة الخامسة من حكاية نرجس، فيه مسلسلات كتير مؤخرًا بنشوف فيها مشاهد الدفن والعزاء، التركيز على وشوش الأخين كان مهم، عوني (حمزة العيلي)، اللي ملامحه حزينه لكن مش بيعيط، وجمال (أحمد عزمي) دموعه موقفتش، المشهد مؤثر كله، والمشاهد دي عادة بتكون مؤثرة، لكن الحلو هنا اللقطات القريبة كان ليها أهمية في المشهد اللي بعده، ما بين نرجس (ريهام عبد الغفور) وعوني، هو أنا ليه يا نرجس معرفتش أعيط على أمي؟، هنا بنفهم إن عدم بكاء عوني مش مجرد اختيار من المخرج أو الممثل، لكن هو وراه مشاعر أساسية جوه الشخصية».
مشهد الدفن في مسلسل حكاية نرجس
وأضاف أندرو: «الحوار كله في المشهد ممتع، فيه بناء سلس وتصاعد جميل، ما بين إن عوني بيفتح قلبه لأول مرة بالشكل ده لنرجس، وإنها بتحاول تكذب عشان تخفف عنه المشاعر دي، الأحلى هو تصاعد الأداء، وتكون الدموع في عين نرجس شوية شوية، اللي إحنا مش عارفين ده عشان الجريمة اللي عملتها ولا عشان جوزها صعبان عليها، وأخيرًا دموعه هو بتنزل لما حس إن أمه كانت بتحبه حتى لو عرف ده بعد ما ماتت، وحتى لو إحنا كمشاهدين عارفين إن ده مش حقيقي».
واختتم قائلا: «الدقة في تكوين المشهد، إن كل واحد منهم بيتصور في لقطة قريبة لوحده وهو بيتكلم، عشان نشوف ردود الفعل على الكلام، بينما مش بنشوفهم مع بعض غير في الآخر وهو في حضنها، من غير كلام، عشان مش مطلوب حوار هنا».
أبطال مسلسل حكاية نرجس
مسلسل حكاية نرجس بطولة ريهام عبد الغفور، حمزة العيلي، تامر نبيل، سماح أنور، دنيا ماهر، بسنت أبو باشا، أحمد عزمي، وآخرين، إلى جانب فريق عمل متميز من معالجة وسيناريو وحوار عمار صبري، وفكرة وإخراج سامح علاء، وإنتاج محمد مشيش.
