قراءة في تتر «نرجس»
لم يلخص تتر مسلسل حكايته، والأهم روحه، مثلما فعل تتر مسلسل «حكاية نرجس»، لم أندهش حين وجدت اسم نادر عبدالله كمؤلف لكلمات التتر، الذى غنَّته المطربة رحمة من ألحان عزيز الشافعى، فالشاعر نادر عبدالله بداخله كاتب درامى، يلتقط الحكاية من أبسط التفاصيل الحياتية، جماله يكمن فى أنه محب للبشر، متصالح مع الحياة، وهذا يمنحه صفاء رؤية، وشفافية وجدان، تساعده على التقاط العادى أو ما نتخيله نحن عادياً، ليتحول بعصا كلماته السحرية إلى مدهش. بعد تترات سيد حجاب وعبدالرحمن الأبنودى أحسسنا باليتم الفنى لفترة، وسكننا الإحباط فى أننا سنعيش فترة جدب وقحط فى كلمات تترات المسلسلات، لكن وجود نادر الذى كتب لنا هذا العام تتر «حكاية نرجس» و«اللون الأزرق»، وكانت تترات فى منتهى الإبداع، مُحلقة خارج السرب.
نادر لم يهبط على فن كتابة الأغنية بالبراشوت من فراغ، لكن نادر معادلة جهد ربع قرن كتابة ومعافرة، 500 أغنية مع 170 مطرباً ومطربة، من مصر والعالم العربى، 15 جائزة وتكريم كأفضل شاعر أغنية، وتكريم عالمى من فرنسا من خلال جمعية «ساسم SACEM» للمؤلفين والناشرين بوصفه الأكثر تأثيراً بين صناع الموسيقى فى الشرق الأوسط، مشاركات بتترات درامية فى عدة مسلسلات مثل «أبوالعروسة» - جزء ٢/ «فرعون»/ «مزاج الخير»/ «ولاد تسعة»/ «يا أنا يا أنتى»/ «حكايتى»/ «شطرنج»/ «ليه لأ»/«طريقى».
الآن إلى كلمات التتر التى هزتنى، والتى استطاع نادر ببراعة أن يحل بها المعادلة الصعبة فى تقديم حكاية، وفك شفرة شخصية هى ضحية واقع قاسٍ ملىء بالضباع التى تنهش امرأة لمجرد أنها قد حُرمت من الخلفة. الشر شكّلته الظروف، ليس طفرة جينية، ولكنه صناعة اجتماعية من واقع ردىء، نادر مشى على السلك، ووزن كلماته بميزان الذهب، فنرجس مدانة، ومتهمة، لكن من اختزلها فى رحم وبطن منفوخة هو أيضاً مدان، ومن نهشت فى لحمها وسمعتها لأنها تحمل لافتة «عاقر» هى أيضاً مجرمة، نادر فهم فلسفة الحكاية وصاغها عقد لؤلؤ من الكلمات، يقول نادر:
أنا مش بريئة وعارفة إن أنا مذنبة
بس انتوا برضو كمان ما كنتوش أسوياء
موِّتوا فيَّا زمن الحتة الطيبة
ومن البجاحة كمان بتعملوا أبرياء
أنا مش بريئة وعارفة إن أنا مذنبة
بس انتوا برضو كمان ما كنتوش أسوياء
موِّتوا فيَّا زمن الحتة الطيبة
ومن البجاحة كمان بتعملوا أبرياء
تستنوا إيه من حد عشتوا طول حياتكم بتوجعوه؟
من حد كل ما يلقى نفسه تضيعوه
وبتجبروه ويغلط وبعدين تلعنوه؟
يرجع يتوه.. بتمنعوه من التوبة ليه؟
تستنوا إيه من حد جرحه ولا دمه ما همكوش؟
فوق طاقته شال الهم بس ما كفاكوش
وما سبتوهوش يرتاح وليه ما رحمتهوش؟
ولا سبتوا رحمة ربنا تنزل عليه
مخنوقة ده أنا بشحت كمان نفَس الهوا
متكتفة وعايشة بين الموت والحيا
حرمانى كان زى العيا اللى مالوش دوا
فأنا خدت وتعودت على كتر العيا
تستنوا إيه من حد عشتوا طول حياتكم بتوجعوه؟
من حد كل ما يلقى نفسه تضيعوه
وبتجبروه ويغلط وبعدين تلعنوه؟
يرجع يتوه.. بتمنعوه من التوبة ليه؟
تستنوا إيه من حد جرحه ولا دمه ما همكوش؟
فوق طاقته شال الهم بس ما كفاكوش
وما سبتوهوش يرتاح وليه ما رحمتهوش؟
ولا سبتوا رحمة ربنا تنزل عليه.
الله عليك يا نادر،
اسمعوا التيتر تانى واستمتعوا،
صدقونى مصر ولادة.
