المباريات من غير جمهور ملهاش طعم.. والتشجيع حلو بس الأدب أحلى

11:02 م | الجمعة 30 أكتوبر 2015

عشقه لكرة القدم والتشجيع فى الاستاد يفوق الخيال، وانتماؤه إلى الزمالك تحديداً بات شائعاً بين أقاربه وأصدقائه، فمن أجله ينجذب «إبراهيم محمد» إلى كل ما هو أبيض، ووفاءً له يشجعه وقت الخسارة والمكسب، ويسانده فى السراء والضراء، أما أمنيته الوحيدة فتنصب على عودة الجماهير إلى الاستاد.

■ منذ متى وأنت تشجع نادى الزمالك؟

- من أول ما شفت وعرفت يعنى إيه ماتش كورة.. بعشق الزمالك من وأنا فى ابتدائى، وهفضل أحبه طول حياتى. {left_qoute_1}

■ هل كنت دائم التشجيع فى الاستاد؟

- معظم المباريات كنت بحضرها، لأن الاستاد ليه متعة خاصة، وأنا عن نفسى معرفش أتفرج على ماتش للزمالك تحديداً فى القهوة، وبضطر حالياً أشوف الماتشات فى البيت عشان أركز فى اللعب.

■ وما شعورك وأنت غير قادر على حضور المباريات؟

- متضايق جداً، وأمنيتى الوحيدة ترجع الجماهير، بشرط تطبيق القانون بشكل صحيح، يعنى اللى يغلط يتعاقب مهما كان طالب أو دكتور أو عامل نظافة، لأن ده اللى بيحصل فى كل دول العالم، جمهور إنجلترا كان أكتر جمهور مشاغب فى العالم، وبعد تطبيق القانون أصبح أرقى جمهور فى العالم.

■ ما رأيك فى فريق الزمالك الحالى؟

- تقريباً ده أحسن جيل جه فى الزمالك خلال 12 سنة فاتوا، وأتوقع بالوقت واكتساب الخبرة هيحقق بطولات وأرقام قياسية.

■ هل يؤثر عشقك لكرة القدم على حياتك الشخصية والمهنية؟

- أنا بحب الزمالك حب غريب من غير أى مصلحة، وانتمائى له زى انتمائى لأسرتى وبيتى، وده مأثرش على دراستى وحياتى، أنا خريج الأكاديمية الحديثة بالمعادى قسم نظم ومعلومات إدارية، وأعمل فى شركة سيارات، ونفسى أتطور وأتقدم فى شغلى.

■ وبماذا تحلم؟

- نفسى ربنا يوفقنى فى اختياراتى الشخصية، وحال البلد ينصلح، كمان أتمنى الزمالك ياخد الدورى والكأس وبطولة أفريقيا الـ10 سنين اللى جايين وكأس العالم للأندية طبعاً.