نصيحة «عائشة وليلى» فى الانتخابات: «سيبوها بظروفها.. واستفتوا قلوبكم»

09:50 م | الأحد 22 نوفمبر 2015

بسعادة ونشاط توجهت السيدتان عائشة أحمد محمد، وليلى نصر، إلى لجنتهما النسائية بمدرسة فتحية بهيج الإعدادية بنات، فى حى عابدين، «عائشة» ربة المنزل، لم تفوّت من قبل أى استحقاق انتخابى سواء دستور أو رئيس أو برلمان، كذلك الأمر مع «ليلى» التى تحتفظ بوجهة نظر خاصة جداً فى الانتخابات، تجعلها على ثقة تامة، لا سيما فى وجود الرئيس عبدالفتاح السيسى «اللى مش هيرضى بحاجة وحشة للبلد» حسب قولها، ما يجعلها متفائلة، رغم عدم علمها بأسماء المرشحين. {left_qoute_1}

«عائشة» الخمسينية شأنها ككثيرين لا يعرفون المرشحين لكنها انتخبت باطمئنان: «الناس خايفة عشان مش عارفين المرشحين، طيب ما أنا مش عارفاهم، سواء الجديد أو القديم، بس هنعمل إيه؟ خلينا نعتمد على الإعلانات ولافتات الدعاية وخلاص، ما هى جايبة صورهم وأسماءهم وأشغالهم، هيعملوا إيه أكتر من كده؟»، تنصح «عائشة» المترددين من المواطنين فى التوجه إلى لجان الاقتراع بحكمتها الدائمة: «سيبوها بظروفها»، وتضيف: «زى ما تيجى، المهم تنزلوا، ولو مش عارفين المرشحين استفتوا قلوبكم وخلاص، وبكرة ينجحوا ونسمع ونشوف، نعتبرها بداية بقى وربنا يسهلها لو ارتحنا لهم ننتخبهم تانى، ولو ما ارتحناش نشوف غيرهم».

وجهة نظر تتبناها أيضاً «ليلى» التى التقت «عائشة» صدفة على باب اللجنة، واعتبرت موافقة اللجنة العليا للانتخابات على ترشح الأسماء المطروحة بمثابة شارة خضراء، ببساطة شديدة تقول: «هو مين اللى بيشرف على اللجنة العليا وكل اللجان والهيئات فى مصر، الرئيس السيسى طبعاً، وعمرهم ما هيختاروا حاجة وحشة ما دام هو مراقبهم»، وجهة نظر تجعلها تطمئن لكل المرشحين: «كلهم كويسين صحيح معرفش حد فيهم، بس ثقتى فى السيسى والناس اللى معاه كبيرة جداً».

«ليلى» اختارت مرشحاً «مسيحياً» وقائمة تحمل بين اسمها كلمة «مصر»، وتقول: «أكتر ناس اتأكدت أن معندهمش أى ميول إخوانية، معرفش برامج ولا أى حاجة، لكن متأكدة إن اللى جاى أجمل»، ظلت ليلى تبارك لكل الموجودين فى اللجنة من قوات أمن، جيش وشرطة، وموظفين وقضاة، مؤكدة: «مصر بخير يا ولاد» لتفارق بعد عبارتها الأخيرة اللجنة والابتسامة ترتسم على وجهها.