أقباط عن ممنوعات الكنيسة في ليلة الحنة: بقينا شبه السلفيين

01:17 م | الأربعاء 30 ديسمبر 2015

أثار التحذير الذي أصدره المجلس الإكليريكي المحلي في إيبارشية ملوي وأنصنا والأشمونين للأقباط الأرثوذكس، المعني بالأحوال الشخصية للأقباط، برئاسة الأنبا ديمتريوس، أسقف الإيبارشية، بشأن ممنوعات "ليلة الحنة"، والتي تشمل "الرقص الخليع، والدي جي، والمخدرات، والخمور"، جدل قبطي على مواقع التواصل الاجتماعي.

وقال إيهاب إبراهيم: "أيه التهريج ده إحنا بنعيد العصور الوسطى في الكنيسة الكاثوليكية بنرجع محاكم التفتيش، كل واحد حر، وبعدين أنا عايز أفهم أيه الآلية اللي هتشتغل بيها هتبعت مندوب من الكنيسة يحضر الحنة، ولا أيه بالظبط".

وقال ماجد ماجد: "للأسف الكلام دا اتطبق في إيباراشيات كتير القرارات دي خاطئة إحنا كده بقينا شبه السلفيين في تحريم ومنع، واخدتم دور ربنا، الكنيسة دورها تعلم وترشد وتهتم روحيا بالناس، وبعدين الناس ليها حق تخطئ، وربنا هوا اللي هايحاسب البشر، أرجو أن كل الإبراشيات اللي عامله التحريم دا تتراجع عنه".

وقال توني إسحق: "هو أنا عندي تعليق صغير هو كلام كويس طبعا، وإحنا فاهمين يعني أيه سر مقدس وكنيسه أرثوذكسية، وعقيدة وكل الكلام الكبير ده بس فكرتو أيه تفكير كل اتنين عايزين يتجوزو ويعملو فرح، ويفرحو أول حاجة هايفكروا فيها يغيروا الطائفة عشان يعرفوا يفرحوا مش لازم يشربوا ويرقصو رقص خليع بس ممكن حنة رومانسية عشان اليوم يعدي، وعلى فكرة القرار صح 100%، وهاتلاقي ناس كتير مبسوطة بيه بس أغلبهم أب وأم نفسهم يشوفوا بداية حياة أولادهم تكون مقدسة وعفيفة".

وقالت ماريان كمال: "اتفق معاكم لكن يا ريت الكنيسة تهتم شوية بدورها في الخدمة، من افتقاد الشعب، وخدمته ورعايته مش بس التسلط، وإصدار القوانين والحرمان حتى لو ابتدى البيت من غير الحفلات ديه عاوز اللي يزوره، ويهتم بذهابهم الكنسية ونملي قلوبهم بحب ربنا، وده مش بيحصل ده اللي ييروح بيطفش من طريقة المعاملة الشعب المسيحي ضاع من قلة الخدمة والقدوة".