أسرة «جمعة»: الأب يريد «ثورة أخلاق».. والأبناء «متمردون» والجدة «تستعوض ربنا».. إنها حقا عائلة مصرية

09:12 م | الأربعاء 30 ديسمبر 2015

على كرسى خشبى داخل غرفته البسيطة بمنطقة المعادى، يجلس «جمعة» أمام نجله الصغير، يمسك بين يديه صورة والده المتوفى. حنين جارف إلى أخلاقيات منتصف عمر الرجل الأربعينى الأولى، التى تربى عليها وسط عائلته، ولم يجدها فى أبنائه «بتوع جيل اليومين دول»، حسب وصفه، دفعته فى الرغبة لعمل «ثورة أخلاق» بعد تدهورها، يقول: «محتاجين الأخلاق ترجع زى زمان، هى موجودة بس فى زمن الفيس بوك وعصر التكنولوجيا اللى بقينا فيه ده اختفت».

اعتاد جمعة حسن، المقبل من المنيا بحثاً عن الرزق قبل 15 عاماً، الجلوس مع أبنائه الأربعة لتعليم الأخلاق وثقافة الاعتذار التى لم يرها فى هذا الجيل، تارة يجتمع بهم على رصيف العقار الذى يحرسه، وتارة أخرى فى غرفته البسيطة، ويقول: «طول اليوم ببقى حريص أتكلم مع عيالى وأحكى ليهم على حياتى زمان، وفى وسط شغلى لما بستريح بقعد مع حسن ابنى الصغير اللى فى تانية ابتدائى من يوم ما وعى للدنيا، وأفضل أحكيله إنه لازم يحترم الكبير، ويعنى إيه يبقى ولد عنده أخلاق والناس تتكلم عنها، وفى آخر اليوم بقعد مع بناتى آية وندى اللى فى الإعدادية، وأحكى لهم على أبويا اللى مات وإزاى كان بيربينا وجدتهم اللى لحد دلوقتى شريكة فى تربيتهم معايا». {left_qoute_1}

ساعات معينة، يحددها الرجل الأربعينى لأبنائه للجلوس معهم والحديث عن الأخلاق وثقافة احترام الغير: «أنا راجل على قد حالى، بس ده مش معناه إنى مكنش مهتم بتربية عيالى وأخلاقهم، عشان كده محدد لأولادى من يوم ما ربنا رزقنى بيهم وقت معين نتكلم فيه عن الأخلاق، وأربيهم على كل اللى اتربيت عليه زمان». بابتسامة لا تفارق وجهه، يروى «جمعة» حكايته مع والده لأبنائه، والقصص التى كانت تجمعه بحياة كانت مليئة بالاحترام والتقدير: «كنت بخاف وأفهم أبويا من النظرة، لو فى وسط 100 واحد ببقى فاهم عايز يقول لى إيه وأنفذه، ولو كنت غلطان بعرف غلط فى إيه، غير اللى بشوفه فى عيال اليومين دول وأولهم عيالى وعيال صحابى، الجيل كله دلوقتى مختلف عننا بكتير فى كل حاجة، والأخلاق بالنسبة لهم مش مفهومة، ومهما علمتهم وفهمتهم فى حاجات غصب عنهم بيعملوا زى أصحابهم وسلوكيات متربناش عليها خالص». {left_qoute_2}

«حسن» الابن الأصغر، هو المشكلة التى تواجه «جمعة» فى تربية أبنائه الثلاثة، بسبب خوفه عليه من السلوكيات غير الأخلاقية التى يراها فى «شباب اليومين دول»، ويقول: «عارف إن حسن لسه صغير بس هو الوحيد اللى بيعرف يفتح الكمبيوتر والنت عن إخواته كلهم، ومتأثر جداً بالتكنولوجيا وأصحابه اللى قده مختلفين عنه خالص، بس فضوله بيخليه يقلدهم وده مخوفنى عليه فى اللى جاى»، مضيفاً: «دلوقتى العيال بشوفهم بيشربوا سجاير وهما فى ابتدائى قدام باب المدرسة وأنا بروح أجيب ولادى، ومبقاش فى خوف من المدرس ولا من الكبير، ولا فى سمع وطاعة للأهل زى زمان خالص، مهما حاولت أربى صح، أخلاق زمان مبقتش موجودة»، «عارف إن بابا كل كلامه صح، بس هو مش قادر يفهم إن أيامه غير أيامنا»، قالها الطفل حسن، ابن حارس العقار.

ما بين الأب «جمعة» وأبنائه، ترى الجدة «سميرة»، والدة الأب، تدهوراً فى الأخلاق بشكل ملحوظ، ولا علاقة لها بأخلاق الزمن الجميل، على حد وصفها.

تتذكر الجدة «سميرة» أثناء تربية أبنائها قبل 45 عاماً: «كنت فاكرة إن عيالى وقتها تربيتهم صعبة، والأخلاق وقتها كنت حساها متغيرة، برغم إنى ربتهم أحسن تربية، وطلعوا من بيت بسيط جداً كان كل حلمهم التليفزيون أيام ما طلع أبيض وأسود، ووقتها افتكرت إن مش عارفة أربى عيالى»، أما الآن، «نستعوض ربنا» تستكمل كلامها ساخرة: «مبقاش فى رهبة وخوف زى الأول ولا هيبقى، لأن الأخلاق عمرها ما ترجع من تانى زى زمان، إلا بحبوب أخلاق تترمى فى النيل زى ما عمل فؤاد المهندس فى الفيلم، عشان ترجع أخلاق زمان».