«زكى وصلاح ومصطفى»: 3 فى مهمة «ساقعة»

11:40 م | الأربعاء 27 يناير 2016

أجواء مناخية سيئة منعت مواطنين كثيرين من النزول إلى أشغالهم، لكنها لم تمنع «زكى وصلاح ومصطفى» من مواصلة أعمالهم فى حفر شارع «خاتم المرسلين» بالجيزة، من أجل توصيل مواسير الغاز، وبحثاً عن لقمة العيش.

عمال حفر على باب الله، اعتادوا على الشقاء، دون الاكتراث بأحوال الطقس المتغيرة، حتى إن وصل الأمر إلى عواصف ثلجية حذرت منها هيئة الأرصاد الجوية، فيقول «زكى»: «إحنا مش تبع هيئة حكومية، الحى بيجبنا عشان نحفر الأرض، وبنشتغل باليومية مع بقية العمال اللى تبع المحافظة، أنا وصلاح ومصطفى نزلنا للشغل فى الجو ده لأننا غلابة، والمضطر يركب الصعب».

تحت الأمطار، وفى ظل البرودة الشديدة، وقف الشباب الثلاثة ممسكين بفؤوسهم وبدأوا الحفر: «أكل العيش مر، وإحنا نفسنا نتعين فى الحكومة، ومحتاجين لليومية اللى بناخدها، لكن غيرنا قاعدين تحت اللحاف بيدفوا»، حسب «زكى».

لم يكترث «مصطفى» لعدم نزول بعض زملائه للعمل بسبب الجو السيئ، لكن كان ما يشغله تلك الملابس الخفيفة التى يوفرها «الحى» لهم، رغم العاصفة الثلجية التى كادت تجمد الدم فى عروقهم، حسب وصفه: «ما عنديش مشكلة إنى أنزل فى الجو البرد ده، لأن أكل العيش مش بالساهل، بس كل اللى نفسى فيه لبس يدفينى، وخصم للعمال اللى امتنعوا عن النزول، عشان إحنا اللى دايماً بننزل فى أى جو من غير هدوم تحمينا، وبيرفضوا إننا نلبس جواكيت فوق الزى المخصص لينا».