«عرفة».. صانع حقائب: محتاجين دعم الحكومة

07:24 م | الجمعة 29 يناير 2016

جلس على مكتبه الخشبى القديم، بينما وضع أمامه «بوتاجاز» بعين واحدة، لصنع كوب شاى مثلما اعتاد كل صباح، أحمد مصطفى عرفة، أقدم صانع حقائب فى سوق «أم الغلام»، يضحك وهو يقول: «أنا عمرى 80 سنة، جيت فى المكان ده وأنا شاب، شفته وهو بيتبنى طوبة طوبة.

يعتبر «عرفة» نفسه شاهداً على عملية افتتاح السوق فى عهد جمال عبدالناصر، فحسب كلامه، لم يكن افتتاحاً عادياً، بل أتت بعثات من الولايات المتحدة الأمريكية وقتها لترى السوق، باعتبارها مركزاً للصناعات اليدوية فى العاصمة، «وقتها الأمريكان اللى جم للمكان، أعجبوا جداً بفكرة المركز، أصل هما ساعتها كانوا متقدمين، وبيعتمدوا على الكمبيوتر فى كل حاجة فى التصميمات، وكانت الصناعات اليدوية بالنسبة لهم من الإنجازات اللى المفروض يدعموها، وساعتها معظم اللى شغالين فى المكان منحوهم هدايا عبارة عن مشغولات يدوية وكانوا منبهرين بيها».

السخرية هى الطريقة التى يواجه بها «عرفة» تبدل الأحوال فى السوق، مؤكداً أنه يدفع ضرائب على القمامة شهرياً تصل إلى 15 جنيهاً، وأحياناً أكثر بجانب فواتير الكهرباء، على الرغم من عدم وجود أى جامع للقمامة: «أنا إللى بنضَّف المكان، وأكنسه وأكنس الطرقة اللى بينى وبين المحلات التانية، ولما ييجى الزبال بياخد الشاى بتاعه ويمشى وخلاص».

الإهمال من وجهة نظر «عرفة» طال الكثير فى المكان، سواء المبنى أو أصحاب الحرف الذين لا يجدون الدعم المناسب لهم، وفى المقابل المسئولون يتحججون بأن أصحاب الورش هم سبب هذا الإهمال: «كل واحد هنا نفسه مهنته ماتروحش ومحتاج مساعدة من الحكومة، والمساعدة هنا مش فلوس، إحنا مش عايزين أى فلوس، عايزين ناس تفهم اللى ناقص المكان وتوفره لينا، فمثلاً فيه ناس محتاجة آلات معينة ومش عارفة تجيبها منين، وفيه ناس محتاجة المكان ينضف، فى ناس تانية الترميم بالنسبة لها هو الأمل لأنه هيجر رجل الزبون، وفيه ناس نفسها يبقى فى دعم على الخامات».