«الزنهور» تحلم بقطرة ماء: «يا تتخانق.. يا تمرض»

10:38 م | الجمعة 05 فبراير 2016

واقع يقترب من المأساة، يعانيه أهالى عزبة الزنهور بمركز فيصل فى الجيزة، فالبيوت تخلو من المياه النظيفة، يزيد عليها الشكاوى والمناشدات العديدة التى تقدموا بها إلى الحكومة والمسئولين، لكن دون جدوى، لتستمر قريتهم دون مياه صالحة للشرب، والأزمات الناجمة عن تلوث المياه المتوفرة، مثل مرض الفشل الكلوى الذى يفتك بأجسادهم. {left_qoute_1}

450 متراً تقطعها الحاجة «مكة» من منزلها البسيط إلى طرمبة المياه النظيفة فى قريتها، لتقف فى طابور ممتد بالساعات، للحصول على مياه صالحة للشرب تملأ بها «جردلها» دون جدوى: «بيتى مفيهوش ماسورة ميه، والبيوت كلها فى القرية زيى، واللى عنده ماسورة بتنزل الميه ملوثة ولونها أسود، يعنى حالنا أحسن منهم، وكلنا بنقف على الطرمبة وبيبقى بالخناق».

معاناة حقيقية لا تنتهى، عندما تنفذ آخر قطرة مياه داخل منزل «مكة محمد»، فيبكى أحفادها طلباً للطعام والشراب، بينما تعجز الجدة عن تحمل بكائهم الذى لا يهدأ قبل أن تهرول قاصدة «طرمبة» المياه الوحيدة فى قريتها: «ولادى مجوزاهم كلهم، والـ5 عايشين معايا فى نفس البيت بعيالهم، وأنا اللى براعيهم عشان كل واحد مرتبط بشغله ومشاكله، وأول ما الميه تخلص فى البيت العيال مابتتحملش، عشان مابعرفش أعمل الأكل بالميه اللى مش نضيفة، كفاية علينا الغسيل اللى بنغسله فى الترعة».

الحياة التى تتحملها السيدة الخمسينية بشق الأنفس، زاد من صعوبتها إصابة 3 من أحفادها بمرض الفشل الكلوى بسبب المياه الملوثة: «مصطفى وأيمن وسيف أحفادى جالهم المرض الوحش بسبب الميه اللى بنشربها، ومفيش حد بيسأل علينا، ده غير العزبة اللى مافيهاش غير وحدة صحية واحدة بتخدم علينا كلنا، ومافيهاش أى إمكانيات، واحنا ناس على قد حالنا».

المهندس محمد سعيد، نائب رئيس الجهاز التنفيذى لمياه الشرب والصرف الصحى بالجيزة، أوضح أنه يوجد 9 قرى فى الجيزة تحت الدراسة لتوصيل مواسير مياه صالحة للشرب: «يوجد أولويات للقرى عشان ندخل فيها المواسير، من بينها عدد الأسر اللى عايشين فى القرية، لكن بالتأكيد الكل هيدخل له مواسير»، مشيراً إلى أن عزبة «الزنهور» من القرى المخطط مدها بمواسير المياه: «القرى دى تحت خط الفقر، والمسئولين اللى قبلنا أهملوها، وقريباً هنطورها، ونمد مواسير الميه للبيوت».