بالصور| أسر صيادي زينة البحرين في انتظار ذويهم: لو رقاصة كان المسؤولين اهتموا

01:31 م | السبت 06 فبراير 2016

أعرب أفراد أسر الصيادين المصريين المفقودين في السودان عن استيائهم، متهمين الخارجية والجهات المسؤولة بالتقاعس عن حل أزمتهم والبحث عن المفقودين.

وبنبرة حزينة، قالت ميادة شقيقة صلاح أبو حجازي: "أين نتائج البحث التي يعلنها المسؤولون مرارا وتكرارا، عايزين أبنائنا أحياء أم أموات، الصيادين وضعوا جثمان السيد العفيفي أول الصيادين المتوفين على متن برنش وهو ما يؤكد أنهم ما زالوا على قيد الحياة".

واتهمت "ميادة" المسؤولين بالتقاعس عن البحث عن شقيقها وزملائه، مضيفة: "خلاص نسينا طعم الحياة ولا عادنا بناكل ولا نشرب نسينا معنى الحياة"، مضيفة: "ولادنا مش أقل قيمة من الإيطالي اللي الدنيا قامت ومقعدتش، البلد من غير رجالة، عزبة البرج وأسطولها البحري ولا حاجة، بصوا لنا واهتموا حرام اللي بيحصل ده".

فيما أجهشت والدة صلاح قائلة انت اللى بتزق الباب على يا ضنايا أنت نور عيني وسندي في الدنيا، معقولة خسرتك ومش هشوفك ثاني، قلبي والع عليك يا ضنايا، خسرت شقيقك من قبلك، وأنت الوقتي عايزاك حي أو ميت يا ضنايا على الأقل ألاقي جثمان أزوره يا رب".

وقفت علا عبد الغني، زوجة علي عياد أحد المفقودين وبجوارها أبناؤها ووالدة زوجها وشقيقته، وبملامح حزينة يائسة رددت "علا" قائلة: "أنقذوا ولادنا سواء أحياء أو أموات ذنبهم إيه ولادهم يتيتموا بدري ده إحنا عايشين في شقة إيجار وهو سندنا وعكازنا"، وتضيف والدته الكهلة: "عايزة أعرف مصير ابني سواء حي أو ميت ده كثير عليا يا رب، يرضي مين ده، 11 يوم ما نعرفش حاجة عن ولادنا والمسؤولين إيدهم في مياه باردة".

وتقول منى الزاهد، شقيقة زوجة حسن العفيفي، ريس المركب: "أختي بتموت في بيتها يرضي مين اللي بيحصل ده لو كانت راقصة كان المسؤولين اهتموا ووجدوها، ده إحنا وقفنا لك طوابير عشان ننتخبك أنت فين يا سيسي فين يا ريس بالله عليك هات لنا ولادنا خلاص دموعنا جفت حزننا على ولادنا وفقدنا الأمل".