أهالى باب الخلق: «المديرية اتفتحت بس الشارع لسه مقفول»

10:59 م | الثلاثاء 16 فبراير 2016

متاريس، حواجز أسمنتية ورجال مرور يحوّلون مسار السيارات المتجه نحو شارع بورسعيد أمام مديرية أمن القاهرة، إلى شوارع أخرى، أبواق السيارات تطلق نفيرها ضيقاً من انتظار دام لمدة عامين فى تطوير مبنى المديرية بعد تفجيره على أمل عودة حركة المرور كما كانت فى الماضى لكن «الحلو مايكملش» فبرغم زيارة وزير الداخلية لافتتاح مبنى المديرية الجديد ومشاهد التطوير التى تجلت فى الشارع كألوان الطلاء البراقة وأعلام مصر التى كست أعمدة الإنارة، إلا أن منافذ الشارع ما زالت مغلقة أمام المارة إلى جواره. {left_qoute_1}

محله يبعد أمتاراً عن الشارع الذى مر 3 أيام على زيارة وزير الداخلية له وافتتاح المبنى المعطل منذ عامين، اعتقد «عاطف جابر» أن الزيارة فتحة خير وأن الشارع سينال من الحب جانباً، قبل أن يكتشف استمرار الحال على ما هو عليه «مااعرفش هيقفلوه لحد إمتى الدنيا زحمة والحركة واقفة ودى منطقة شعبية مش شارع منعزل»، يلوم الرجل الخمسينى على المحافظة ووزارة الداخلية التشديدات الأمنية التى لا تتلاءم مع طبيعة ميدان حيوى مثل باب الخلق: «خد احتياطاتك واقفل قدامك لكن ماتقفلش الحركة خالص».

يختلف «سعيد أحمد» معه فى الرأى، معللاً ذلك بالمرار الذى ذاقه رجال الأمن من العمليات الإرهابية وخسائرها: «حقهم يقفلوه، ما هو اللى شافوه مش قليل.. إحنا نستحمل لكن المبنى متكلف عشان ينضف يقوموا يسيبوه عشان يتفجر تانى، كفاية أن الشوارع الخلفية مفتوحة للى ماشى على رجليه عشان يحصروا عدد اللى داخل واللى خارج»، بينما يرى «حلمى» صاحب محل الخضراوات والفاكهة بالميدان أن خير الأمور الوسط «يفتحوه ساعة الذروة وخروج المدارس ويقفلوه من الساعة 12 بالليل ويزودوا الحراسة عشان الزحمة دى حرام وعطلة ووقف حال».