بالتقسيط: «اختارى الولادة طبيعى وقيصرى على 24 شهراً»

10:44 م | الأربعاء 17 فبراير 2016

«عمّالة تحسبى مصاريف الولادة من دلوقتى؟.. متحسبيهاش كتير.. الولادة بالتقسيط من غير مقدم».. على طريقة حجز الوحدات السكنية، أصبحت «الولادة» بـ«القسط المريح».. خدمة جديدة يوفرها موقع إلكترونى مخصص فقط لتقسيط العمليات الجراحية دون فوائد أو إجراءات بنكية. {left_qoute_1}

هاتف لا يتوقف عن الرنين وسؤال وحيد، لا يستقبل «ياسر»، موظف خدمة العملاء بالموقع، سواه: «هو صحيح الولادة بالقسط؟»، بعد شرح مطول، تدرك السيدة الحامل من المكالمة الهاتفية أنها تستطيع تحديد الطبيب والمستشفى، وأيضاً نظام السداد من 6 إلى 24 شهراً دون فائدة، لكن وفق عدة شروط.

«لازم ضامن، الزوج أو الوالد ولازم يكون موظف، ومفردات مرتب، 3 إيصالات كهرباء، وعقد إيجار أو تمليك للشقة.. وبعد ما نبحث الحالة نرد بالموافقة ويتم دفع المقدم وتقديره بيبقى من قيمة إجمالى العملية، وفيه استثناءات لدفع أقل»، هكذا لخص «ياسر» الشروط المطلوبة، مشيراً إلى أن التكلفة المذكورة تحدد المقدم: «لو العملية سعرها أقل من 6 آلاف الحالة مش بتدفع مقدم، هى رسوم إدارية 200 جنيه، ورسوم تسجيل 100 جنيه داخل القاهرة أو 300 للمحافظات».

«ياسر» يؤكد أن موقعه ليس فكرة جديدة: «الموقع معمول حديثاً لكن المقر بتاعنا فى المقطم من سنين وعندنا عملاء من كل المحافظات»، وتابع: «الفكرة جت عشان تزيح عن كاهل المتزوجين حديثاً أو الأسرة متوسطة الدخل أعباء مصروفات الولادة غير الثابتة»، وقال: «كل دكتور وله سعر والمستشفيات بشروط، وكل أمّ لازم تبقى مطمّنة هتولد فين والجنين هيبقى سليم ولا لأ، وفى نفس الوقت ما تدفعش اللى وراها واللى قدامها».

مبلغ العملية لا يُسلم للحالة، فالموقع يرسل مندوباً يودع التكلفة باسم الحالة المذكورة: «وممكن الحالة تدفع لنا المقدم يوم الولادة الصبح». وأضاف مسئول خدمة العملاء: «مش الولادة بس اللى بندفع تكاليفها، ممكن عمليات التجميل وشفط الدهون وتصحيح الإبصار والأسنان وجراحات العظام وبنرشح دكاترة على أعلى مستوى».