يا محسنين لله.. الحضن للبردان
والعشق للجدعان.. فماتخذلوش روحكم
الحلوة في المعضلة.. بتحل ماتعقّدش
والحزن مابيفضلش.. والعمر قدامكم
ماتحَنّوا أقدامكم.. من دم طول الصبر
ما هو كل شيء هيّن.. إلا انحناء الضهر
هو أنتوا كام واحد هيكمّل المشوار؟
مافضلش غير واحد سهران في عرض نهار
وكفاية واحد بس.. الحلم يا بهوات ماياخُدش غير واحد!
لو سهل تحقيقه.. كان يبقى حلم بجد؟!
ده ماكنش يغلَب حد.. لو مرمي في الشارع
يا عم هات ساقع.. واعزم على القاعدين
خلينا نتفرج ..
الدنيا إيه غير امتحان للناس؟
معقول هنفضل نمتحن فيها ..
من غير ما نتخرّج؟!
اللجنة واسعة وكلها مراقبين
والناسي يكتب إيه على الورقة؟!
يا بحر صيف مليان ببني آدمين
أنده لمين ينجدني م الغَرقة؟
العشق يشفع للي مش بيئن
مش شيء أليف هتجيبه وتربيه!
العشق تاج محروس بملك الجن
فعليك تحارب .. أو تفرّط فيه!