كل سنة بقى طقس وفرض وعادة إني أنشر نفس الخاطرة في هذا الميعاد..
السنة الجديدة بتخبط على الباب ومبقاش فاضل غير كام يوم وتبدأ أول صفحة في كتاب سنتك الجديدة.. سنة هتتضاف لمسلسل حياتنا.
كتير مننا بيقولوا إن كل سنة خلاص بقت شبه اللي قبلها بس أنا باقول إن كل سنة ليها طابع مختلف لكن من كتر ما أحنا بقينا متشائمين ومش شايفين حاجة غير الإحباط والقرف والقبح مبقناش ناخد بالنا من التغيير اللي ممكن يكون على مستوى أكلة مبقتش تاكلها أو تحبها زي زمان.. استايلك في اللبس غيرته.. عادة بطلت تعملها.. خبرة اكتسبتها.. معلومات جديدة عرفتها .. رأي كنت منشف دماغك في الثبات عليه وغيرته.
ناس قابلتهم.. ناس خسرتهم.. أكيد حصل تغيير يعني ولو طفيف بس أنت ركز هتلاقي.. المهم وبدون نصايح التنمية البشرية اللي بقت محفوظة عن ظهر قلب، فكرت يا عزيزي هتعمل إيه في السنة الجديدة؟
هتقول لنفسك أهي سنة وهتعدي ولا قولت إنك هتقف وقفة مع نفسك وتعيد حساباتك في الحياة اللي أنت عايشها ..قولي بس هترضى تبقى مجرد سنة زي اللي فاتت وأهي عيشة والسلام على رأس الست إليسا ولا أنت ليك رأي تاني وقررت ميبقاش فيه جرح تاني زي الست شيرين؟؟
عموما أنا حاسة إنك هيبقى ليك رأي تاني!
أنا مش باحب السنة تعدي من غير ما تمر على دولاب عقلي وبعيدا عن شغل النجارين أنا عملت في دماغي دولاب مكون من 5 أقسام :
القسم الأول أو أول درفة : باحط فيها كل حاجة جميلة وحلوة وإيجابية حصلتلي طول السنة " الهدايا اللي جت لي ، المواقف الكوميدية اللي حصلتلي ، الحفلات والخروجات اللي روحتها وانبسطت فيها ، الناس اللي اتعرفت عليهم واتشرفت بيهم ، إنجازات حققتها ، أحلام بقت واقع ، من الآخر أي حاجة فرحتني وخطفت أنفاسي باحطها في القسم ده علشان افتكرها وقت ما أكون متضايقة وكارهة حياتي وعلشان تديني أمل إن الحزن مش دايم زي الفرح مش دايم".
القسم الثاني : ده قسم السلبيات والإحباطات والحاجات السيئة اللي مرت بيها ومليان كمان بالصفات السلبية اللي فيا وبالمواقف اللي اتصرفت فيها بغباء والأوقات اللي حسيت فيها إني غلطت في حق أصدقاء ما يستحقوش اللي عملته فيهم ، ناس غلطت فيهم وندمت ، وحتى لما باغلط في حق نفسي في أي موقف باحط الموقف في القسم ده ..تقدر تقول القسم ده هو الصندوق الأسود بتاعي.
القسم الثالث : بقى ده كوليكشن كامل ( درفة التقييم ) باحدد فيها المواقف اللي اتصرفت فيها بذكاء والمواقف اللي اتصرفت فيها بغباء وباراجع نفسي بدون جلد للذات بس باعيد تقييم المرحلة زي ما المسئولين والخبراء والمحللين اللي ملوا البلد بيقولوا !!
القسم الرابع والخامس : مفتوحين على بعض زي شقق التجمع اللي بدورين ، القسم الرابع باحب اسميه قسم (الفلترة أو الفصل من المنبع) لأني بافصل فيه الحاجات الإيجابية أو الجيدة اللي طلعت بيها من السنة اللي فاتت واللي قررت إنها تكون معايا السنة الجديدة وبابعد عنها الحاجات السلبية اللي مكنتش راضية فيها عن نفسي واللي قررت إني اسيبها وما تبقاش في حياتي تاني وباروح هوبا رامياها في القسم الخامس .
القسم الخامس : ده شبه (recycle bin أو صندوق القمامة ) بنرميه فيه كل الحاجات السلبية اللي في القسم الثاني وكل الحاجات السيئة اللي طلعت من قسم الفلترة وهوبا تعمل تفريغ ليها علشان السنة تبقى حلوة ونضيفة.
دي كلها كانت مكونات دولاب عقلي .. أنا متأكدة إن كل واحد فينا عنده دولاب زيه بس يمكن مش بيحب يفتحه أو يبص عليه علشان مشغول أو الدنيا بتلهيه أو علشان خايف يفتح الدرفة الغلط أو يمكن علشان بايع الدولاب ومكبر دماغه أو يمكن خايف إن درفة السلبيات أكتر من درفة الإيجابيات فلو فتح الدولاب درفة السلبيات هتقع على دماغه أو يمكن لأنه خايف يجلد ذاته !
الأسباب كتيرة ومختلفة ومش مهتمة أعرفها بس اللي مهتمة بيه إن كل واحد فينا يروح يفتح دولابه كده ويحاول على الأقل يغير أو يعدل حاجة على السريع ..الموضوع فعلا مش سهل بس فيه ناس بتحاول وتنجح وكل اللي أنت محتاج تعرفه إن أكيد السنة الجاية مش هتبقى أسوأ ولا أفضل سنة في حياتك .. لأن أفعل التفضيل دي مش موجودة في سنين عمرنا لكن الحياة ميكس ما بين الاتنين.
وفيه إنسان قادر إنه ما يخليش أي سنة زي اللي قبلها ودول اللي بينجحوا وبيعافروا وبيحققوا اللي هما عايزينه ..
أنا كل يوم باصحى على أمل إن الأقدار تفاجئني بحاجة جميلة وكل يوم بيبقى عندي الأمل ده .. أكيد مش كل مرة بيتحقق بس في مرة اتحقق ومستنية مرات تانية واثقة بإذن الله إنها جاية في الطريق..
وبالإذن بقى علشان اروح افتح دولابي..