أحمد حسن أثناء اشتعال سيارته
تداول اليوتيوبر أحمد حسن، مقطع فيديو في بث مباشر عبر صفحته الرسمية على موقع التواصل الاجتماعي «فيس بوك»، يروي خلاله كواليس اشتعال سيارته أعلى الطريق الدائري، أثناء تواجده رفقة زوجته زينب وابنته، وذكر أحمد حسن في البث المباشر، أنه كان في طريقة من أكتوبر لصقر قريش، وبدون وجود أي أنذار من العربية، فؤجئ بأحد الأشخاص بجواره، يخبره بالتوقف لوجود دخان يخرج من سيارته.
وبحسب «حسن»: «أول ما ركنت لقيت كمية دخان رهيبة طالعة من العربية، روحت منزل زينب وأيلن، وبمجرد ما قربت عند الكبوت لقيته بيولع، رحت بعدت عنه، وجبت طفاية حريق مع اللي جنبي، وحاولنا نطفي الجزئية اللي ولعت، لقينا حوالي 30 طفاية حريق بتحاول تطفي لكن الحريق بيزيد، وكنت شايف شقايا بيولع قدام عيني، بدون أي سبب».
واستطرد «حسن»: «أنا كنت بحلم بقالي سنين علشان أجيب العربية دي، وبعدين ألاقي حصل كده، الحمد لله إن مراتي وبنتي بخير، محدش طفاها غير المطافي، وقعدوا فترة علشان يقدروا يطفوها، حاولت أخلي زينب تمشي، لكنها كانت بتعيط ورفضت تسيبني».
وأوضح «حسن»: «قولت أوثق اللي بيحصل علشان أثبت حقي، فطلعت لايف، علشان العربية لسه جايبها من 5 شهور وماشية 10 آلاف كيلو بس، وألاقيها بتولع بالمنظر ده، بدون أي سبب».
وبحسب «حسن»: «ردي على الناس اللي بتقول دي مجرد عربية، لا دي حلمي واتحرق، انا لو مشتري كوتشي وبتعبي هزعل عليه، فما بالك بعربية مرسيدس غالية، أنا كل ما أشوف صورة العربية وهي متشالة على الونش ومتفحمه بالكامل، أحمد ربنا على اللي حصل، طب لو مكنتش خدت بالي من الدخان والعربية انفجرت، متخيلين كان هيحصل ايه؟».
وأضاف «حسن»: «العربية انفجرت بعد ما نزلنا منها بدقيقة فقط، الحمد لله أن الموضوع كان متيسر، وفيه واحد قالنا أركن على جنب العربية بتدخن، فنزلنا بسرعة، لكن كل فلوس بضاعة المطعم اللي كنا هنجيبها ملحقتش أخدها، ولا كاميرا ولا لاب ولا التليفون، حاجات تمنها يعدي 200 ألف جنيه».
وواصل «حسن» حديثه: «بتسائل فين الأمان بتاع عربية بالنوع ده، وبشكر جدا تعاون الشرطة معانا، وروحت عملت محضر بالواقعة، وطلبوا المعمل الجنائي يفحص العربية ويعرف ايه سبب الحريق، فوجئت أصلا ان فيه ناس كتير بتقولي أن معاهم نفس نوعية العربية وحصل معاهم نفس الموضوع برضه».
وأضاف: «هو فيس بوك بيطلع أرباح؟ طيب ما كنت نزلته على يوتيوب، ولو بعمل شو هولع في عربيتي اللي تمنها فوق المليون جنيه، أنا مشهور ومش محتاج أعمل شهرة، بس أنا عاوز حقي، استبدلوهالي بواحدة مكانها، ومش طالب تعويض ولا طالب الحاجة اللي جوه العربية ولو تقدروا ترجعوا العربية اللي بقت كوم تراب رجعهوالي».
وأكمل: «عارف أن دي حاجة من عند ربنا، وبقول الحمد لله إننا طلعنا سلام أنا ومراتي وبنتي، تخيلوا لو دلوقتي بدل ما كنتوا بتتفرجوا عليا كنت هتترحموا عليا».
وأختتم: «قولت للناس اللي بتدعي علينا ربنا يهديكم ومرضتش أدعي عليهم، وهتابع مع شركة مرسيدس ولما حقي يرجع هبلغكم».
تعليقات الفيسبوك