نجيب ساويرس
مطعم المشاهير، لقب أطلق على عربة أكل بأحد شوارع الشيخ زايد في محافظة الجيزة، بسبب اعتياد مشاهير الفن والرياضة على زيارته بشكل مستمر، وكان آخرهم رجل الأعمال المصري الشهير، نجيب ساويرس الذي قضى نحو النصف ساعة هناك رفقة صديقة، مؤكدًا أنه أفضل ساندوتش كبدة وسجق في مصر.
ياسر صابر، صاحب مطعم المشاهير، روى خلال حديثه لـ«الوطن»، أن الفكرة جاءت إليه بعد قيام الثورة في عام 2011: «كان عندي محل في إمبابة، ولما الثورة حصلت فكرت افتح كرفان صغير وبعدين حولناه عربية كبيرة في الشيخ زايد».
عدد كبير من المشاهير بمثابة زبائن دائمين لمطعم المشاهير، بحسب «ياسر»: «حازم إمام الكبير، وأحمد حسن الصقر، وأيمن أشرف لاعب الأهلي، ونجوم مسرح مصر بيأكلوا عندنا كتير».
«بنعمل سندوتشات من أغلى توابل ولحوم بنجيبها من أفضل هايبر، ده المميز في المطعم واللي بيخلي كل المشاهير ياكلوا عندنا»، هكذا برر «ياسر» سر إقبال المشاهير على مطعمه: «إحنا بنعمل حاجة مميزة إن الأكل كله بيتعمل قدام الزبون، يعني بيشوف اللحوم من بداية ما بنطلعها من الكيس لغاية ما بتتحطله في السندوتش، فبيكون واثق أنها طازة».
ويصل سعر أغلى ساندوتش في المطعم إلى 35 جنيها، كما أوضح «ياسر»: «بنعمل تقريبا 20 صنف، بنعمل حاجات كتير غير الكبدة والسجق، زي البرجر البلدي، والكفته، والجبنه السايحة أنا اللي بعملها بنفسي».
وروى ياسر صابر، صاحب المطعم، خلال حديثه لـ«الوطن»، كواليس نصف ساعة قضاها رجل الأعمال الشهير نجيب ساويرس أمام عربة الكبدة لتناول سندوتش سجق وآخر كبدة على غرار صديقه الذي معه.
«أحلى سندوتش سجق وكبدة في مصر»، تلك الكلمات التي غرد بها «ساويرس» عبر صفحته الشخصية على موقع «تويتر»، مرفقا صورة للمطعم مع أصحابه، ليروي «ياسر» كواليس النصف ساعة التي قضاها هناك، قائلا: «ساويرس جه مع صديقه، لتناول سندوتش سجق وآخر كبدة لكل منهما، والناس اتلمت عليه علشان تتصور معاه، وفعلا اتصور معاهم كلهم وتعامل معهم بتواضع».
وروى «ياسر» عن أغرب واقعة سرقة تعرضوا لها في زايد: «الكارافان اتسرق في 2014، لقينا واحد بيتصل بيساومنا عاوز 40 ألف جنيه علشان يرجعها، بس لما رفضنا راح مرجعها لكن أخد منها كل حاجة رجعها وهي مفيهاش غير الصندوق فاضي، لقيناه بيتصل بينا بيقولنا إن العربية بتاعتنا المسروقة في الدائري، سايبها واقفة هناك، قالنا روحوا خدوها أحسن تتسرق تاني».
تعليقات الفيسبوك