جنب قبرِك
جنب قبرك كل حاجة بتصحى تاني
زي روح تترد جوا كل ميّت .. إلا انتي!
طب وحشتي .. وإتوحَشتي
أفترض إنك معايا
وأبدأ أحكي لك حكاية
أفترض إنك سمعتي
وأتقمص منك وأمشي
لما ماترديش عليّا!
أنقتل بإيدين سكوت الأرض
وأبكي
لما حد يقول لي ماتت
ببقى عايز أثور وأزعق:
أمي حية
جنب قبرك
ببقى بشبه عبد زاهد كل شيء
ذكريات عُمري اللي عشتك فيه
تمثّل دور صديق لو تآمن ليه يخون
لما أفتح عيني وأتفاجأ بإنك
صورة ثابتة فوق إزاز دمعاية
واقفة عند أبواب الجفون
تعرفي إن دموعي سكتت مع سكوتك؟
رغم إني ضعفت جدا بعد موتك!
مش هجيب لك حاجة حلوة؟
مش هلاقي رنّة منّك .. أتصل فتقولي هاتلي؟ مش هعدّك لما أعرّف حد أهلي؟
"ربنا يرحمها" صعبة
ع اللي قال "إشفيها" ياما!
جنب قبرك كنت قاعد أقول:
"رضيتي؟ يعني مش زعلانة منّي"
السكوت أوقات بيوجع.. لما مش بيكون علامة!
