دايمًا المشكلة اللي بتقابل أي حد عايز يسافر هي الوقت والفلوس وساعات الوجهة نفسها اللي عايز تسافرلها. الموضوع أبسط من كده والسفر يعتبر من أسهل الحاجات اللي ممكن تعملها، وفي نفس الوقت تتعلم منها كتير، واللي بتعتبر من أهم أنواع اسثمارك في نفسك، ومش محتاج فلوس كتير زي ما البعض متخيل، وكمان عمرك ما هتوه.
بالنسبة لتذاكر الطيران، لو أنت محدد وجهة معينة، ومحدد وقت السفر ممكن تدخل على موقع زي travelstart.com، وتختار أرخص تذاكر طيران في الوقت اللي أنت محدده بس جرب تدور خلال الأسبوع كله اللي أنت عايز تسافر فيه علشان يوم أو يومين ممكن يفرقوا جامد في أسعار التذاكر.
طيب لو مش محدد الوقت بس عارف الوجهة ادخل على موقع Skyscanner.com، وشوف منه أرخص وقت للوجهة دي طول السنة بس متنساش تشوف توقعات الجو في الوقت ده علشان متروحش في جو "وحش"، أو جو أنت مش هتبقى مبسوط فيه. طيب لو أنت مش محدد وجهة أو زمان، وكل اللي بيحددك تكلفة معينة ممكن تدخل على skyscanner.com، وتختار everywhere وCheapest month هيجيبلك أرخص أسعار التذاكر طول السنة لكل مكان في العالم بس خلي بالك برضه من كذا نقطة، أولًا توقعات الجو، ثانيًا تكلفة المعيشة في البلد اللي هتسافرها غالية ولا رخيصة، وكمان إذا كان مطلوب للبلد فيزا وتكلفتها أد إيه.
نيجي بقى للمكان اللي هتقعد فيه، لو حابب تقعد عند حد ببلاش أدخل على موقع couchsurfing.com، واختار مضيف مناسب وده بيكون عن طريق إنك تراسل الناس اللي عندهم أكبر عدد من التعليقات الإيجابية لناس قعدت عنده فعلًا وبكده تتضمن إنه إنسان ثقة، مش بس تقعد عندهم أنت ممكن تراسل الناس المحليين عن تفاصيل الأماكن اللي ممكن زيارتها وعن أماكن أصلًا ممكن ميعرفهاش إلا سكان البلد المحليين، وأي حاجة هتسأل عنها هتلاقي الناس متعاونة معاك جدًا، ممكن كمان تكتب مناقشة عامة تسأل فيها عن كل اللى أنت عايزة، وأي حد عنده إجابة هتلاقيه دخل رد عليك.
طيب لو عايز تقعد في مكان تأجره ويكون رخيص، يبقى ممكن تدخل على موقع airbnb هتلاقي ناس عارضين شقق لو عددكم كبير أو أوضة في شقة وبتبقى سعرها معقول. أو أدخل على موقع booking.com، واختار hostel أو hotel يكون سعره رخيص، بس في نفس الوقت موقعه في وسط البلد أو قريب من الأماكن اللي ناوي تزورها، وكمان قريب من محطات المواصلات العامة.
بالنسبة للإجازات، إحنا كمصريين معندناش أكتر من إجازات الأعياد والمناسبات فطبعًا ممكن تاخد إجازة نهاية أسبوع مع إجازة عيد، ويومين كمان من إجازتك السنوية، هيبقى عندك إجازة طويلة، وأنت محافظ على رصيد إجازاتك.
قبل متسافر ممكن تدور على النت على خريطة المكان، وتعمل خطة بالأماكن اللي هتزورها، وعايز تعمل إيه بالظبط علشان متضيعش وقتك، حط الأماكن اللي قريبة من بعض في نفس اليوم، وأعرف كمان من خريطة المواصلات هتركب إيه، واسم المحطة علشان توفر وقت كتير كان هيضيع في التفكير والسؤال.
بالنسبة لتكلفة المعيشة أنت اللي بتحددها يعني مثلًا اسأل قبل ما تسافر إذا كانت مياه الصنبور صالحة للشرب ممكن ساعتها تمشي بـ"إزازه" فاضية تملاها لما تحب، كمان المواصلات ممكن توفر بإنك تشتري التذاكر اللي صالحة للاستخدام بعدد الأيام اللي إنت رايحها، وكمان في تذاكر تشمل المواصلات، ودخول بعض أو كل المتاحف ممكن تسأل عليها أو لما توصل البلد.
اعتقد مفيش أسهل من كده، وملكش حجة. السفر فعلًا ليه سبع فوائد، وكمان حاجة سهلة وفي متناول الجميع، استثمر في نفسك وسافر.
لصور أكتر عن رحلاتي ممكن تزور صفحتي