الربيع.. أسوأ موسم على الإطلاق
وتلف السنة من تاني، ويرجع موسم الربيع، أسوأ موسم على الإطلاق في مصر.
على عكس كل ما يروَّج له في كل الأغاني الخاصة بالربيع، من أول الست سعاد "والدنيا ربيع والجو بديع" إلى فريد "وآدي الربع عاد من تاني!"، فإنّ الربيع في مصر يتميز بأنّه الموسم الأسوأ صحيًا على مختلف الأصعدة، خد عندك مثلًا:
* بداية من الست سعاد "والدنيا ربيع والجو بديع" هتبدأ المصايب، خاصة على فئة معيّنة من المرضى، وبالمناسبة هي فئة كبيرة العدد في مجتمعنا المصري، ركِّز كدا الست سعاد حسني بتكمل وبتقول إيه في الأغنية "قفّل لي علي كل المواضيع، قفل، قفل، قفل، قفل!.
وهي تقول قفل من هنا، ويبدأ كل مرضى الحساسية يقفّلوا من هنا
مناخير بتقفل من حساسية الجيوب الأنفية!
وصدور بتقفل من حساسية الصدر!
وعيون بتقفل من حساسية العيون والرمد الربيعي!
وكأنها كانت فاهمة وبتتريق علينا L
في فصل الربيع في مصر، بيحصل أكتر من حدث سيئ جدًا، بتهب رياح الخماسين بكل ما تحمله من أتربة، وطبعًا التراب أحد أهم مثيرات الحساسية بكل أنواعها.
وبتتفتح الزهور ودي لوحدها كارثة كبيرة لأن تفتح الزهور بيصاحبه خروج لحبوب اللقاح منها ودي بردو أهم مثيرات الحساسية وبردو بكل أنواعها.
كمان في فصل الربيع في مصر بتبدأ درجة الحرارة في الارتفاع بشكل ملحوظ، موجات متتالية من الحر بتنشط فيها كل أنواع البكتريا والفيروسات خاصة المنقولة عن طريق الأكل والشرب.
وأنت عارف بقى على رأي الست شيرين "ماشربتش من نيلها"، واللي هايبقى لينا معاها واقفة تانية بعدين.
كمان فصل الربيع يعتبر فصل انتقالي، يعني بتتغير فيه درجة الحرارة من البرد للحر، مش بس على مدار أول شهرين فيه، لكن حتى على مدار اليوم الواحد وبالتالي، مابتبقاش عارف، تشيل الشتوي ولا تسيبه!، تنزل بجاكت ولا بنص كم؟، وتكون النتيجة لخبطة في جهازك المناعي ونزلات البرد بقى والإنفلونزا، على كيف كيفك.
طب نعمل إيه؟
أهم حاجة، إوعى تصدق كلام الأغاني، فلما يقولولك إنّ الدنيا ربيع، إوعى، إوعى تصدق الباقي، لأن لا الجو بديع ولا نيلة، الجو في أسوأ حالاته.
ثانيًا، اقعد في بيتكم وبلاش صرمحة، آه والله، دا فصل مش بتاع خروج خااالص، ولو إنت عندك حساسية، إياك والحدائق، إياك أنا حذرتك أهو.
أو أقلك، اخرج براحتك وهاستناك في العيادة :-P
ثالثًا بقى، أدوية الحساسية من بخاخات وأقراص، التزم بيها زي ما دكتورك بيقولك وبلاش علشان خاطر ربنا تطلع الدكتور اللي جواك اليومين دول، علشان الغلطة بفورة حضرتك، وهاتقضيها مشاوير من العيادات للصيدليات لمراكز الآشعة وتنتهي لسرير بيتكم طبعًا.
قد أعذر من أنذر، وكل ربيع وانتوا بصحة وسلامة.
ودمتم بخير
لو حابين تعرفوا معلومات طبية أكتر ممكن تنوروني على صفحتي على الفيس دي:
كمان ممكن تتفرجوا على فيديوهاتنا الطبية اللي من الآخر.. "في العضل" من هنا:
