حي
حلم عيل
حس نفسه مش قليل
شاف فـ وش الشمس ذاته
والشجر واخد صفاته
وانه قادر..
يعدل الكون لو يميل
... .... .....
فتح شباك وطار منه
مستناش
جاب الشمس من إيدها
تصحي الناس
شّرب البحور أزرق
علم الورود تضحك
ولما لحظته حانت
مامتش وعاش
.... .... .... ....
دفع عمره بطيب خاطر
مكنش فـ باله غير خاطر
عشان بكرة تهون أشياء
ولجل براح نزل خاطر
.... .... ..... ...
صرف ع الحلم من دمه
وأهله حتى ما اهتموا
وايه ياخد طليق الروح
من اللي بطنه بتمثل أساس همه!
.... .... .... ...
يا اللي حميت الحي
وضربوا عليك بالحي
في نوع قليل م البشر
لو مات بيفضل حي
