من فوق شريط القطر
الساعة: نُص الليل
والصيف نهارُه طويل
والجسم لو ينطق تسمع له نفخة سور
م اللي بتحيي الميتين تاني
فرتكت تحويشتي من الأيام
وجمعتهم على شكل أحزاني
والله واحشاني
بس الإيدين قصروا
من كُتر ما انكسرُوا
ماتجمّليش في الصورة علشاني
أنا عارف إنك حلوة زي الشمس
والشمس حرَّاقة
حلاوتها تبهر من بعيد لبعيد
والدنيا دي خناقة
على حاجة مش بتدوم
-إن جات في يوم أصلا-
الدنيا خنَّاقة!
بصّيت على كل الوشوش ضاحكين
وسألتهم: مين مننا أحزن؟!
وغريب ماحدش رد!
الورد ليه دبلان؟! مع إننا في ربيع!
سامع سعاد حسني بتقول مافيش مواضيع
علشان نقفّلها
قُلت: البقاء لله .. حتى سعاد ماتت!
الغنوة لما تكون بريئة بجد
لازم تقابل حد يقتلها!
يارب يا ذا الحلم
هيئ لنا من أمرنا رشدا
العقدة واصلة لحد حَلْقْ الحَلْقْ
ومفيش حلول جُوا العقول واردة!
فإزاي أنا أهدى
المعجزة تحصل في غاية الابتلاء والصبر
مربوط أنا بشبه لرقبة إسماعيل لكن ..
أنا فوق شريط القطر
والقطر بيقرّب
يا رب عَجل القطر مابيرحمش
وأنت الرحيم .. يا ربنا.. طبطب
