«أحمد» طالب الثانوية يناشد المارة: «خد بلحة.. وادعيلى»

10:47 م | السبت 04 يونيو 2016

اقترب موعد امتحانات الثانوية العامة، تحول الكثير من المنازل إلى ما يشبه معسكرات الحرب، قوانين استثنائية، توتر، وساعات طويلة أمام الكتب، فضلاً عن خطط للمذاكرة لا تبدو واقعية فى الغالب، مشاعر مختلطة بين الرغبة فى النجاح، والخوف الشديد من الامتحانات، فى مواجهة مرحلة «الوحش» يبدأ كل طالب فى وضع خطته الخاصة من أجل إحراز مجموع مرتفع، ومن بين هؤلاء أحمد خالد، طالب الثانوية العامة الذى وضع خطة مختلفة بعض الشىء.

{long_qoute_1}

«نستغل إننا هنكون فى رمضان، وده شهر كريم لا ربنا ولا الناس هاتبخل علينا فيه» تحدث الشاب إلى أصدقائه المقربين فى البداية ليعرض عليهم الفكرة «نجيب مثلاً علبة أو علبتين تمر ونوديهم لمسجد أو اتنين عشان الناس تفطر بيهم بس هنعمل حاجة زيادة، هنلزق ورقة على وش العلبة من فوق، مكتوب عليها: ثانوية عامة وبامتحن محتاج دعوتك على الفطار». «تفتكر هتجيب نتيجة؟» سؤال ساخر استقبل به الأصدقاء فكرة «أحمد»، لم تهز يقينه بجدوى خطته «طبعاً، كل ما إنسان يفطر على التمر ده هنكسب ثواب». الشاب العشرينى الذى يقطن فى الإسكندرية اعتاد سنوياً توزيع التمر فى ساعة الإفطار، لكن فكرة الربط بيت التمر ورمضان والثانوية واتته حين تذكر موقفاً له فى الصف الأول الثانوى «كنت راكب الترام، والكمسرى سألنى فى سنة كام، قلت له فى أولى، قالى لما توصل تالتة ذاكر كويس، عشان ماتبقاش فاشل زى ابنى» مقولة جعلته يدرك قوة «الدعاء» حتى للفاشلين «قلت ليه الواحد مايقربش من ربنا، واحنا كلنا فى عرض دعوة، فى ساعة إجابة عشان ربنا يكرمنا». أربع ساعات نوم فى اليوم فقط، ومذاكرة بقية اليوم، ورغم ذلك يؤكد أحمد «لو ربنا هيدينى على قد تعبى يبقى هاروح فى داهية، محتاج رحمته ودعوة من القلب إنه يوفقنى».