نظرة في المرآة
هل في أغلب الوقت بتلاقي نفسك متغاظ من أفعال شريك حياتك؟، ومستفز دايمًا بسبب عيوبه؟، أو مش قادر تتقبله من كتر سلبياته ومشاكله؟. لو أنت كنت الشخص ده فمعلش كده، استنى لحظة، على فكرة الواحد مش ممكن يتبين عيب في شخص ما إلا لو كان هو نفسه عنده نفس العيب، ولو بدرجة مختلفة، ومفيش شخص مر في حياتك إلا واتعلمت منه حاجة موجودة فيك انت شخصيًا، عشان كده ودي حاجة تدعو للسخرية الحقيقة، إنه كل ما زاد انتقادك لخصلة ما في شخص ما، كل ما كنت أنت نفسك محتاج لنظرة في المراية عشان تتمعن كده وتدقق في نفسك وتدوّر على نفس الخصلة دي فيك، وهاتلاقيها أكيد.
فمفيش أسهل من إننا نشوف الحاجات اللي مش عجبانا في الآخرين، وإننا نركز على عيوبهم طول الوقت، لكن الصعب بجد بأه إننا نمتلك الشجاعة الكافية ونعترف إننا عندنا نفس العيوب ونفس المشاكل، وعلى فكرة وللأسف هو ده السبيل الوحيد للوصول إلى المرحلة اللي بيسموها "النضج الحقيقي"، فمش ممكن نكبر ونتطور وننضج بجد إلا إذا كنا بنقدر نشوف عيوبنا الشخصية بنفس القدرة والوضوح اللي بنشوف بيها عيوب الآخرين.
وعشان الموضوع ميقلبش مننا إلى "جلد للذات" زي ما بتوع علم النفس بيسموه، فكل المطلوب مننا ببساطة، هو إننا نعرف إن الآخر عمره ما هايكون كامل، زينا بالضبط، وإنه مفيش مجال لتبادل الحب والمشاعر الصادقة مع الآخرين إلا إذا قبلناهم زي ما هم، وقبلنا نفسنا كمان على حالها، وبقينا أكثر تعاطفًا وتسامحًا معاهم، ومع نفسنا قبلهم، فمحدش عنده كل حاجة، فالجميع وأولهم إحنا ناقصنا كتير.
