أنا الخطية والثواب
وشيطان رجيم فى عصر لولاد الكلاب
اقلع نعالك قبل ما تخطيلى باب
لا تدنس الرفّ اللى فاضل جوه جلباب بغسله
حلمى شهيد.. وبغسّله
جُم يفتوا أمره اتبرجلوا
وسابولى حق الاختيار
أشوفه زاهد ولّا فالت للعيار
ياللى انت داوشك صوت عيار
أنا صابنى قبلك فاندهشت
فعشت أنا أكتر ما عشت
وسنين حياتى سنان لمشط
مكسورة دايماً نصها من غير سبب
مرمى فى كراكيب اللعب
وفى لحظة تافهة بينكتب
أرمى الكراكيب باللى فيها لأى باب
ومعاها حالة الاكتئاب
وبواقى منى عكّروها بالخطية والثواب