العائلة أهم؟ بجد؟
لو سألت أي واحد مين أهم عيلتك ولا شغلك؟، هيرد على طول وبكل ثقة «عيلتي طبعًا»، أنا عشانهم باشتغل وبتعب وبغيب عنهم بالساعات، أو ببعد عنهم بالشهور والسنين عشان أخلّي حياتهم أفضل، الكل بيردد نفس الكلام، لكن من غير وعي أو فهم حقيقي بيتهيألي.
إحنا مش مدركين إننا بنشتغل بجد عشان نطلع من سلمة للسلمة اللي أعلى منها، عشان نرضي طموحنا إحنا، ونشبع رغباتنا إحنا في الارتقاء والتقدم، ومش واعيين إننا بنسعى عشان نكسب أكتر، عشان نشتري أكتر، ويكون عندنا رفاهيات أكتر، فيكون ده دليل على علو مكانتنا إحنا، وتميّزنا إحنا، وقدرتنا إحنا على التفوق والنجاح، ومش معترفين بأننا بنبعد عن ولادنا و أهلنا بملء إرادتنا أحيانًا كتير اعتقادًا مننا في أن النجاح هو تميّز المناصب وكترة المادة وبس.
مآنش الأوان بأه إننا نصدق أن ولادنا هايكونوا أسعد لو مابقيناش مضطرين نفارقهم طول اليوم؟، وبحجة إننا عايزين نشتري لهم أحدث الأجهزة و الموبايلات باستمرار؟، وإننا نفهم إننا هنكون أزواج أقرب وأحسن لو مبعدناش عن بعض بالسنين؟، عشان نجيب شاليه في الساحل نقضي فيه يومين كل سنة وإحنا مش طايقين بعض أصلًا، وبنفكّر إمتى يخلصوا؟.
غالبًا محدش بيصدق ولا حد بيفهم غير بعد فوات الأوان، بعد ما يمر العمر، والصغيرين يكبروا، والزوجين يبعدوا، واللي حصل يكون حصل وانتهى الأمر، وساعتها نلاقي نفسنا بنقول بحسرة «فعلًا العائلة كانت أهم!!».
