حلال الدنيا دى بيّن
حرامها برضه متبيّن
وأنا واقف بـ«أفرولى»
فى إيدى فُرشة وبلوّن
فى عتم الأرض حواليا
وأدندن زى ما بدندن
لأغنية بصوت سيّد
لكنى عشقتها أكتر..
بصوت فيروزى متسلطن
«زورونى كل سنة مرّة
حرام تنسونى بالمرّة»
يزغزغنى الغُنا فبطير
معايا «بالتة» الألوان
أطـُـول الشمس بإيديا
فـ أحطّ لها عينين اتنين
وأكبر ضحكة فى الإمكان
كما كانت فى كراستى
وأنا صغير فى حصّة رسم
أخلص رسم وكأنى بتمّ الفرض
أهيم فى الأرض
ألم العِدّة ومروّح
وصوت فيروز يلاحقنى
وآخر كلمة فى الغنوة تقولها «حرااام»