مائدة على عربة «كارو» فى السيدة زينب: تسلم يا «أبوحديدة»

03:53 ص | الثلاثاء 05 يوليو 2016

صار معروفاً فى منطقة السيدة زينب، ليس بسبب إصراره على تقديم إفطار للفقراء والمساكين من أهالى المنطقة، ولكن لأنه اختار أن يكون مجهول الهوية، ويرتدى «قناعاً» أسود على وجهه، لكى لا يعرفه أحد. «أبوحديدة» اسم شهرة اختاره الأهالى للرجل الخيّر، ويرى أن معرفة الناس قد تضر عمله الخيرى، لأنه أحد أبناء المنطقة، فتجده يجر عربة «كارو» صغيرة فى الميدان حتى تستقر أمام مسجد السيدة زينب، ويضع عليها وعاءين أحدهما ملىء بالأرز، والآخر يحوى الخضار وقطع اللحم الصغيرة.

«بعمل ده لله، ولأنى من سكان المنطقة وخايف حد يتحرج لما ياكل من اللى بعمله، فبغطى وشّى خالص، والثواب من عنده»، كلمات ينطقها «أبوحديدة» بعد إلحاح، فهو لا يتحدث إلى أى شخص سوى مَن يقدم لهم الطعام ليعرف ما هى طلباتهم، وإذا كانوا يريدون زيادة الطعام.

لا يقيم «أبوحديدة» مائدته إلا فى آخر ثلاثة أيام من شهر رمضان، وهو مستمر فى هذه العادة منذ أربعة أعوام، بحسب «محمد سيد»، أحد الباعة الجائلين، وهو فى الغالب يعمل فى بيع الملابس: «إحنا اللى اخترنا نسميه أبوحديدة، ما إحنا مش عارفين له اسم ولا هوية، وهو فى نفس الوقت بيعمل خير والناس كلها بتحبه وبتقدره علشان طيبته وقوته فى نفس الوقت، واخترنا الاسم ده علشان لما بيجى وقت العصر بيفضل واقف ومعاه الكبشة الحديد اللى بيحط بيها الأكل فقلنا عليه أبوحديدة».