حصري عند المواطن المصري!
يتميز الشعب المصري بعدة خصال وسمات لا تجدها في أي شعب آخر. سمات باتت عادات وتقاليد وطقوسًا روتينية يمارسها هذا الشعب ذاتيًا واجتماعيًا، فقد تشبّع المصري بتلك الخصال التي إن دلت على شيء فإنما تدل على صفات وأمور ندعو الله ليل نهار أن تفني من مجتمعنا والكارثة انتقال هذه السمات تلقائيًا لأبنائنا. وفي ما يلي عرض لتلك العبارات التي تدلل على تلك السمات- وهي على سبيل المثال لا الحصر- لأنها لو اتحصرت هتحتاج مجلدات أطول من سيناريو أي مسلسل تركي أو مكسيكي أو هندي.
* "هاقابلك بعد المغرب"
مشكلة الشعب المصري اللامبالاة وعدم المقدرة على إعطاء موعد محدد ثابت يتم خلاله إنجاز المقابلات أو الأعمال؛ حسبك أن ترى نفسك تعطي صديقك موعدًا وتخبره بالتالي: "هاقابلك بعد المغرب أو هاقابلك بعد العشا أو بعد العصر!" طيب أنت يا ناصح عارف إمتى بالظبط أو الساعة كام يعني هتقابله بعد المغرب أو بعد العشا أو العصر.. أصلها واسعة ولمَ تتبع المذهب البحبحاني بتاع المصري الأولاني اللي يقولك اقوله بعد العشا اثبته بحيث لو جه متأخر أو بدري هابقي مثبته برضو؟! أو اديله ميعاد بدري علشان هو متعوّد يجي متأخر خصوصًا إن المصري معروف بتأخره عن أي ميعاد بساعتين ويقولك الطريق واقف مبيتحركش.
كفاية إني أقولك إن الوقت كالسيف إن لم تقطعه قطعك زي البسطرمة آي والله احترموا الوقت يحترمكم العالم يا مصريين.
* "وقفة باب الشقة"
معروف عن المصريين عادة سخيفة أوي يبقوا قاعدين عند الضيوف 4 ولا 5 ولا 6 ساعات وطول القعدة إزيكم عاملين إيه وإزي أخباركم وأحوالكم وكلاكيت 67596886 مرة إزيكم عاملين إيه وإزي أخباركم وأحوالكم زي الإنسان الآلي بالظبط، ويجوا بقى عند باب الشقة وأهل البيت بيوصلوهم يبدأ الحديث الجاد وتلاقيهم بيتكلموا عن موضوعات مصيرية وذات حيثية وأهمية محورية كله عند الباب أو على السلم.. وروني بقي في البرد بقى هتقفوا إزاي يا حلوين؟؟ وبمجرد وقوفكم هتبقوا متجمدين.. ده احتمال أصحاب البيت ما يقوموش من البرد علشان يوصلوكم وممكن يقولولكم طريقكم أخضر عارفين الطُرقة اللي عديتم عليها خدوا الباب في ايدكو وأنتو ماشين.
* "ده أد أبوك يا أخي"
لقد نشأنا على فكرة عقيمة وهي أن الكبار لا يخطئون وإن أخطأوا لا يُحاسبون ومع الأسف الشديد نزرع بأطفالنا تلك الآفة فإن أخطأ الأب يتأثم من الاعتذار عن خطئه أمام أبنائه بدعوى الكرامة والكبرياء وإن أخطأ الأخ الأكبر نجد الأم المصرية تسارع بالتبرير لذلك الخطأ أمام ابنها الأصغر بقولها: "علشان أنت لسه صغير أما هو فكبير ويعمل اللي هو عاوزه" دائمًا العمر هو المبرر والدرع الواقي أمام محاسبة الكبار على أخطائهم مع أن الأخطاء واحدة مهما اختلف العمر .
* "بكره هأعملها إن شاء الله"
إن صاحب مقولة " لا تؤجل عمل اليوم إلى الغد" اللي كانت لازقة في وشنا على الغلاف الخلفي لكل الكتب المدرسية الحكومية لو شاف المصريين وعمايلهم كان مات مشلول من الانبهار وكان خلا المقولة "ليه تشتغل النهارده لما ممكن تأجل للسنة الجاية؟؟" الحقيقة إننا شعب يحيا على حب التأجيل تأجيل محاكمة مبارك ولا مرسي ولا رفاقهم ولا تأجيل الانتخابات ولا تأجيل الدراسة ولا أي تأجيل في حياتنا ويقولك كل تأخيرة وفيها خيرة، طيّب فين الخيرة طالما إنك بتراكم على نفسك مهام وأعمال بتعطل بيها نفسك واللي حواليك خصوصًا إنك حلقة من سلسلة مجتمعية كاملة لو وقفت الحلقة دي هتقف السلسلة كلها، فألغوا بقى من قاموسكم "حكاية بكره هاعملها " وقول بإذن الله النهارده هاعملها واخلص اللي ورايا".
* "اللهم اجعله خير"
طبعًا هي من أجمل المقولات حينما تستخدم في مواضعها الصحيحة لكن إما تلاقي حد من كتر ما بيضحك بيقول اللهم اجعله خير ده شيء كويس بس بيعبر عن شيء متأصل في ثقافتنا وهو النظرة السوداوية التشاؤمية حتى وإحنا في أشد حالات السعادة.. انبسطوا وافرحوا وربنا يجعل لنا الخير بس بطلوا تبوظوا فرحتكم في التفكير في المآسي وأسباب الشقاء.. افرحوا واضحكوا لو دقيقة يمكن تعوضكم عن حزن سنين "أو لو فكرت بمنطق المصريين التشاؤميين يمكن ما نلحقش نفرح تاني لا داهية لا تكون دي أجمل أيام حياتنا يا مصريين".
* "خدت الكلمة من على لساني"
على الرغم من أن اللغة العربية تحفل بالمعاني والكلمات الفضفاضة وتحفل بتعبيرات غزيرة لا يمكن حصرها تجد المصريين حينما لا يجدون كلامًا جديدًا يؤمنون على الكلام القديم فتجدهم يبادرون بقولهم : "تصدق أنا كنت هاقول كده خدت الكلمة من على لساني يا راجل عمرك أطول من عمري!".
أيها المصري الجميل هل مفروض عليا أصدق إن 85 مليون مواطن بياخدوا الكلام من على لسان بعض ؟؟ ليه حرامية؟؟ ليه عندنا توارد خواطر جبار؟؟ إن من لا يجيد الحديث أو التعبير الملائم فليقل خيرًا أو ليصمت بقى! مش ياخد الكلام من على لسان الناس علشان يداري نقص معلوماته وخبراته ويفتي ويهري وخلاص.
* "طبعا إنت فاكرني مين"
الجملة دي الراعي الرسمي للسان المصري كل إما تجي تفهم حد حاجة أو تشرح له موضوع أو تبين له وجهة نظرك أو تنتقده بأسلوب مهذب يقولك أنت فاكرني مين؟؟ أنا نفسي أعرف حاجة مين المين اللي إحنا كلنا فاكرينه إما بنقول الجملة دي بالذات؟؟! يعني مين الشخص اللي بنخده قدوة سلبية في موضوع فاكرني ده؟؟ هل هو شخص عبيط ولا كانت الناس بتستعبطه ولا متخلف؟؟ المهم لو حد عرف أصل عبارة "إنت فاكرني مين" يقولي أصلي باحب أعرف المعلومات اللي من النوعية دي .. أومال أنا مثقفة ماليش مثيل إنت فاكرني مين يا بني؟!
وختامًا يا رب العبارات الحصري اللي عند المواطن المصري دي تختفي بقي من حياتنا.. ونبقي بنقدر قيمة الوقت ومنسقين ومنظمين ومرتبين وحكيمين ومتفائلين ومحددين ولآراء بعضينا محترمين ومقدرين قولوا آمين.
