ما استغربتيش
ما استغربتيش
إزّاي جارسون القهوة
يجيب لاتنين -أوّل مرة يشوفهم- اتنين عنّاب
ويجيب ويّا الاتنين عنّاب.. شاليموه واحد؟
.....
ما استغربتيش
والفرح الظاهر في عينيكي
بيضحك للعالم بعينيا
وعينيّا بتضحك بعيونك في الميكروباصات
وأنا وانتي على الكورنيش بنغني
ونعزف في السكّة كلاكسات
طايرين في السما حبّة عصافير
وعلى الأسفلت تلات وردات
ما استغربتيش
وأنا ماشي فـ حضنك في الشارع
والشارع هُس
ومفيش غير الفلّ الموجود –جوا الفاترين-
سهران بيبص
وأنا وانتي بنرقص يوم تانجو
ويوم واحده ونص
وبنقسم عُمر الليل بالنص
ما استغربتيش
ما استغربتيش رقة إيدي
ما استغربتيش رقة إيدك
رقة أرواحنا فـ وسط الناس
والناس نايمين على تنهيدك
ما استغربتيش ساعة التحرير
اللي انظبطت على مواعيدك
ما استغربتيش
إزاي الشمس توطي تبوس اتنين أول مرة تشوفهم
وتغني لهم... وتنام بالراحة على كتافهم
وتصبّ النور وقت الأحلام جوّا كفوفهم
ما استغربتيش
ما استغربتيش
إزاي النيل يصبح قارب
وإزاي الأسفلت الوالع وقت مرورهم يبقى جوارب
وازاي سواق مترو فـ رمسيس يستنظرهم
ويسيب باب المترو موارب
ما استغربتيش
إزّاي جارسون القهوة
يجيب لاتنين -أوّل مرّه يشوفهم- اتنين عنّاب
ويجيب ويّا الاتنين عنّاب... شاليموه واحد؟
