مواطنون يشكون سوء حال «المترو»: «طوَّروا قبل ما تزودوا»

09:09 م | الثلاثاء 30 أغسطس 2016

أثار الحديث عن عزم الحكومة الحالية رفع أسعار تذاكر قطارات مترو الأنفاق حالة من الجدل، بسبب توقيت الزيادة الذى جاء فى ظل موجة من ارتفاع الأسعار، البعض يرى أن الحكومة لم تكتفِ بمعاناة المواطن فأرادت أن تضيف حملاً جديداً عليه، بينما يرى آخرون أن الحكومة لم تكن على قدر المسئولية، إذ لم تستطع تحمل الأزمة الاقتصادية وحدها فقررت إشراك المواطن معها، أما الرأى الأخير فيستند إلى أن الزيادة لا بد أن يصاحبها تحسين فى الخدمة التى ساءت كثيراً خلال السنوات الماضية. «هى الحكومة بتستغل إن كل حاجة أسعارها ارتفعت، فبترفع أسعار المترو؟! الزيادة ما لهاش مبرر، لأن الخدمة سيئة خصوصاً خط المرج - حلوان، لا فيه تكييف ولا مروحة، وخط مترو شبرا الخيمة، نفس الحال»، قالتها مى محمد، طالبة فى كلية الإعلام، مؤكدة أنها لن ترفض الزيادة إذا صاحبها تحسين فى الخدمة.

{long_qoute_1}

أحمد قدرى، مهندس من المرج، يرى أن الزيادة مقبولة فى بعض الخطوط، لأن هناك تغييراً حدث بالفعل فيها: «دلوقتى 70% من المترو اللى بيعدى بيبقى مكيف، ودى حاجة إحنا كنا نفسنا فيها من زمان، الخط اللى فعلاً فى حاجة لتطوير علشان الزيادة تناسبه هو خط شبرا الخيمة - المنيب، هو حر جداً ومش مكيف وزحمة رهيبة غير مفهومة، ومفيش أى تنظيم فيه».

أما منيرة سعيد، موظفة بالقطاع الخاص من عين شمس، فرفضت الزيادة: «إزاى يزودوا بالشكل ده، هما شافوا خط المرج - حلوان عامل إزاى، الناس اللى بتركب المترو ومعاها حيوانات صاحية والروايح السيئة والقمامة المنتشرة، وكل ده وإحنا بنركبه عشان مضطرين لسبب واحد هو إنه مفيش غيره يوصلنا، ومع ذلك أنا موافقة يعملوا زيادة بس بشرط إنهم يطوروا المترو نفسه، أحس إنى راكبة وسيلة مواصلات محترمة وآدمية مش بركب جنب الحيوانات».

زينب سيد، طالبة فى جامعة حلوان، ترى أن الخدمة تسوء يوماً بعد يوم، بسبب الزحام الرهيب وعدم التنظيم: «ده المترو بيمشى والأبواب مفتوحة، وبنقف على البوابات بالساعات، وفى الآخر عايزين يزودوا التذكرة طب على إيه؟!».

أحمد عبدالهادى، المتحدث الإعلامى باسم جهاز مترو الأنفاق، رفض وصف الخدمة التى تقدم فى المترو بـ«السيئة»: «لو فعلاً المترو خدمته سيئة زى ما ناس شايفة وبتقول، أمال ليه فيه أكثر من 3 مليون بيركبوا المترو كل يوم»، مضيفاً: «المترو يعتبر أنضف وأسهل وأرخص وأسرع وسيلة مواصلات فى مصر كلها، ومترو حلوان - المرج اللى الناس بتقول عليه سيئ، شغال من 30 سنة وبيخدم منطقة كبيرة جداً، وإحنا مش ساكتين مع ذلك بنطور فيه كل فترة، والدليل على كده إننا اشترينا 20 قطار مكيف جديد بقيمة 2 مليار و200 مليون جنيه علشان يخدم الناس».

واعتبر «عبدالهادى» أنه حتى يتم التطوير بشكل كامل فى كل خطوط المترو، لن يمكن الاستغناء عن القطارات القديمة: «حتى الآن لم نعلن أى زيادة فى تذكرة المترو، فهى ما زالت بجنيه واحد فقط».