أهالى المعادى: «مش عايزين صناديق زبالة»

08:15 م | الأحد 18 سبتمبر 2016

3 صناديق قمامة جديدة فى كل شارع.. فكرة اهتدى إلى تطبيقها مسئولو حى المعادى لحل أزمة القمامة وحثّ الأهالى على فصل المخلفات من المنبع لتسهيل عملية تدويرها، لكن المبادرة التى نالت إعجاب الكثيرين لم تدم طويلاً، بعد أن طلب الحى من الأهالى حراسة الصناديق من السرقة أو الكسر وفق تعهدات رسمية، وفرض غرامة على المخالفين من سكان الشارع.

{long_qoute_1}

ميلاد ميشيل، أحد السكان، رفض صناديق القمامة الجديدة لعدم قدرته على حراستها وخوفاً من تعرضه لغرامات، خصوصاً أن صناديق القمامة بالمنطقة تختفى كلما أحضر الحى صناديـق جديدة، يقول: «الصناديـق عندنا بتتسرق لأنها حالتها بتبقى جديدة، وإحنا مش مطلوب مننا ننام جنبها عشان نحرسها، المفروض الحى يوفر لينا الصناديق ويحافظ عليها، مش يطالبونا بكتابة تعهد واللى ينقص منها ندفع تمنه».

تتراكم أكوام القمامة أمام الأبراج العالية بالحى، وتنتشر الملوثات والروائح الكريهة بسبب تعرض الصناديق بالشوارع للسرقة، ما دفع الحى لعمل مبادرات للحفاظ عليها دون نتيجة، يكمل «ميلاد»: «مانقدرش ننكر إن الحى بيحاول يجتهد، ورافضين إن الشوارع يكون فيها زبالة، لكن مقترحاتهم مش سليمة، إنهم يخصصوا لكل شارع 3 صناديق دى حاجة عظيمة، لكن مش عشان يحافظوا عليها من التكسير والسرقة ندفع 200 جنيه غرامة على الصندوق اللى هيتسرق»، ويتابع: «إحنا رفضنا المبادرة دى لأن محدش هيرضى يحرس صندوق زبالة حتى لو هنربطه بقفل، وحتى لو هنعيش فى الزبالة».

المبادرة تكلفت 25 ألف جنيه، بحسب محمد أحمد، مسئول بالحى: «إحنا كل مرة بندفع أرقام كبيرة فى شراء صناديق جديدة، ففكرنا المرة دى نشرك الأهالى معانا فى الحفاظ عليها وحراستها عن طريق الغرامة التى تصل إلى 100 جنيه لتكسير الصناديق، و200 جنيه عقوبة السرقة».