بالفيديو| مواطنون عن تصريحات رئيس الإحصاء: تعالى إنت عيش بـ482 جنيه في الشهر

10:13 م | الأربعاء 26 أكتوبر 2016

أثارت تصريحات اللواء أبوبكر الجندي، رئيس الجهاز المركزي للتعبئة العامة والإحصاء، استياء عدد من المواطنين، حيث قال إن مبلغ 482 جنيها يكفي مأكل ومشرب وملبس ومسكن ومواصلات وتعليم وغيرها من متطلبات الإنفاق لدى المواطن.

قال مواطن تعليقا على إمكانية المعيشة بمبلغ 482 جنيها في الشهر: "طب خلاص خليه ييجي يعيش معايا وأنا أعيش مكانه وشوفه هيعيش إزاي بالفلوس دي، إذا كنت بدفع إيجار بس 400 جنيه، ده غير مياه ونور ومصاريف عيال، ده أنا لما بعوز أكل لحمة باخد عيالي عند الجزار (نشم) اللحمة ونمشي علشان ممعيش فلوس أجيبها، هنضحك على بعض، ده 50 جنيه مصاريف للبيت كل يوم وأنا أب وعندي 3 عيال أحسبهم بقى 50 جنيه في 30 يوم مش هيعدوا 1000 جنيه على الأقل".

أحمد فهمي، موظف: "الكلام اللي بيقوله رئيس الجهاز المركزي ده كلام لا يعقل طبعا، وأتحداه لو هو عرف يعيش بـ3000 جنيه في الشهر، على أساس إيجار وكهرباء وغاز ودواء ومصاريف للأولاد فطار غدا عشاء، أتحدى لو عرف يعيش بـ4000 جنيه كمان، الكلام اللي بيقوله ده غير مقنع بالمرة، ده أنا بدفع 200 جنية كهرباء و50 جنيه غاز و200 جنيه إيجار يبقى كده دي الحاجات اللي بتدفع كل أول شهر من غير المصاريف التانية التي تشمل فطار وغدا وعشاء، يعني المجموع بمصاريف الأولاد والأدوية والمصروف مش أقل من 1500 أو 2000 جنيه".

وقالت مواطنة: "ده أنا مواصلاتي في اليوم 10 جنيه غير مصاريف الأكل والشرب والحاجة كل يوم بتغلى، يعني اللي بنجيبه النهارده مش بنفس السعر اللي بتجيب بيه بكره، ده غير الحاجات اللي بتختفي ويرجعوا يقولولك مش متوفرة ومش لاقيينها، ده كيس السكر جايبينه بـ15 جنيه وبـ20 جنيه كمان، والكهربا كمان زادت بقت 250 جنيه في الشهر وأمبوبة الغاز وصلت لـ50 جنيه طب أكتر من كده هنعمل إيه، وأنا جوزي مش شغال في وظيفة حكومية ولا ليه معاش ولا ليه حاجة، يعني شغال النهارده مش شغال بكرة هنصرف منين".

وقال آخر: "أنا بدفع إيجار 350 جنيه وعندي ولد وبنت في أولى إعدادي و3 ابتدائي، وبدفع مية 100 جنيه وكهربا 100 جنيه، ده كده 550 من غير مصاريف أكل وشرب ولا مصاريف مدرسة ولا مواصلات للأطفال، يبقى إزاي بقى".

وكان اللواء أبوبكر الجندي، رئيس الجهاز المركزي للتعبئة العامة والإحصاء، أطلَّ على المواطنين بتصريح مثير للدهشة، قال فيه: "إن المواطن المصري يحتاج إلى 322 جنيها شهريًا على الأقل لتوفير الغذاء لنفسه للبقاء على قيد الحياة، أي "عشان يتنفس المواطن يأكل ويشرب بيهم"، لافتًا إلى أن هذه الدراسات تعتمد على أساتذة في التغذية، وأن الـ322 جنيها تكفي لأن يحصل الفرد على 2500 كالوري يوميًا من خلال ثلاثة وجبات من المنتجات التي يتناولها الفقراء.

وتابع "الجندي"، خلال تصريحات تليفزيونية، أن هناك خط الفقر المادي الذي يتضمن المأكل والملبس والمواصلات، ويبلغ 482 جنيهًا شهريًا، يمكن للفرد من خلال أن يحقق أدنى مستويات المعيشة، ويأتي بعد خط الفقر الغذائي والذي يمثل البقاء على قيد الحياة.