شابان يتبرعان بـ19 شقة لمتضررى «رأس غارب»
عبدالله
«عندى 7 شقق فاضية فى مدينة رأس غارب، أى حد متضرّر من السيول يتفضل عندنا لحد ما مشكلته تتحل»، رسالة عبر موقع «فيس بوك»، أرسلها أحد سكان المدينة التى أغرقتها السيول، على جروب خاص بسكان المدينة، فكانت سبباً فى إسعاد الأسر التى فقدت مأواها جراء السيول التى جرفت كل شىء.
عبدالله حامد، 19 سنة، صاحب المبادرة، قال: «أنا وإخواتى عندنا 7 شقق فى مدينة رأس غارب، وبعد كارثة السيول اتصل بيّا إخواتى من الخارج وقالوا لى افتح الشقق لأهالى بلدنا، فدخلت على جروب المدينة بتاعتنا على الفيس بوك، وكتبت رقم تليفونى وإنى عندى سبع شقق فاضية، للى محتاجها لحد ما مشكلته تتحل»، مؤكداً أنه فعل الواجب تجاه أهل مدينته، ففى وقت الأزمة لا بد أن يتكاتف الجميع: «لو الأمر تطلب إنى أسيب الشقة اللى قاعد فيها علشان أهل بلدى هاسيبها».
«عندى عمارة فيها 12 شقة والحمد لله ماحصلهاش ضرر، أى أسر متضررة من السيول تيجى فيها لحد ما ربنا يكرمهم، وشقتهم ترجع زى الأول»، دعوة ثانية للخير تبناها إسلام الشرقاوى، 24 سنة، حيث قرّر فتح عمارته للمتضررين من أهل مدينته: «الناس بتكلمنى لغاية دلوقتى عاوزين شقق، بس للأسف الـ12 شقة سكنوا ولو كان عندى أكتر كنت هاساعد، لأن ده عمل خيرى لابتغاء وجه الله، وكل واحد من أهالى البلد بيساعد باللى يقدر عليه».