مواطنون يشاركون فى تلوين القاهرة: عايزينها تبقى أحلى

09:23 م | الخميس 16 فبراير 2017

طبيب يحمل جردل دهانات وفرشاة، وعامل قمامة يحاول رسم علم مصر على الجدران والأسوار والمظلات الموجودة فى شوارع القاهرة، مشهد يتسع لكثير من التفاصيل، جمع بين البسطاء والأغنياء فى مبادرة تلوين جدران الشوارع الرمادية برسومات وألوان زاهية، التى نظمتها أحياء القاهرة، بتوفير الدهانات للمواطنين لتجميل الشوارع.

على جدران أعمدة كوبرى روض الفرج، رسم محمد إسماعيل، أحد المشاركين فى المبادرة، مناظر طبيعية بألوان مبهجة، ممسكاً بالفرشاة والدهانات التى وفرها الحى للأهالى، ليعيد إحياء جدران منطقته القديمة برسومات خلابة تلفت أنظار المارة، متخلياً عن البالطو الأبيض للمشاركة: «شاركت فى المبادرة من تانى يوم، لما لقيت الناس نازلة فى الشوارع وبتدهن الحيطان، بقيت أنزل قبل ميعاد العيادة بساعتين عشان أشارك فى تجميل الشوارع»، لم تقتصر المشاركة على سكان روض الفرج فقط، بل شاركهم عمال النظافة والفواعلية بالمنطقة حسب الطبيب الخمسينى: «كلنا تجمعنا وساعدنا بعض، رسمنا ولونا ومكنش فيه فرق بينا، وعملنا رسومات كلها فيها بهجة وروح، وفى موظفين من الحى نزلوا رسموا معانا كمان».

لم تكتف ناهد عبداللطيف، طالبة بجامعة القاهرة، بتلوين جدران شوارع منطقتها بولاق أبوالعلا فقط، بل أحضرت معها مأكولات خفيفة للمشاركين فى المبادرة: «هدفنا هو الخير لمصر، وفرحت جداً أول ما الحى أعلن عن المبادرة ووفر الدهانات للسكان عشان ينزلوا بنفسهم يدهنوا شوارعهم ويجملوها، عشان كده فكرت أنزل بأكل خفيف للناس اللى شاركت، وفيه جيران كتير شاركوا بعمل شاى ومشروبات سخنة لكل اللى رسموا ولونوا الشوارع»، 5 ساعات، المدة التى قضتها الشابة العشرينية وجيرانها فى تلوين جدران الشوارع القديمة بالمنطقة: «8 شوارع أغلبها رسموا جدرانها ولوناها بألوان حلوة، وعلم مصر، بعد ما كانت مشوهة بعبارات سياسية وإعلانات وألوان غير متناسقة تماماً».