لازم الفيس بوك يعمل enemies list بدل الـ friends list.
ونرجع ونواجه موجة جديدة من تقاليع موقع الفيس بوك الشهير، ألا وهي تطبيق أو موقع "صراحة"، كلنا طبعاً لقينا أصحابنا على صفحات الفيس بوك عاملين ياخذوا screenshot لرسائل الصراحة اللي بيستقبلوها من صديق، والمفروض إنه عندك في الـ friends list، يعني مش غريب ولا معرفة بعيدة.
طبعاً في أول ظهور للرسائل قرأت كلام حلو كتير من صديق لصديقه زي "إنت جدع.. صاحب صاحبه.. راجل في المواقف"، طبعاً كلام يفرح أي حد، أو من صديقة لصديقة "بنت جدعة بميت راجل.. بحبك علشان وقفتي معايا في أزمات كتير.. إنتي أم صالحة جداً مع أولادك".
أنا من الناس اللي فرحت للكلام الحلو اللي اتقال بين الشباب والبنات، وحسّيت إن العلاقات لسه فيها خير، لكن طبعاً لازم نلاقي زي المقولة الشهيرة "تأتي الرياح بما لا تشتهي السفن"، وألاقي screenshots عكس الأولانية "حقد، غل، كراهية، سواد"، للآسف ما بقتش صراحة، بقت وقاحة.
من أشهر الرسائل واللي تركت أثر سيء جداً على مواقع التواصل كلها، إن صاحب الرسالة -وطبعاً الله أعلم هو ولد ولا هي بِنَت- بعتت الرسالة لرجل.
إيه ده؟ وليه قد كده الكراهية والحقد مالية قلوب بعض الأصحاب، واللي للأسف قاعدين عندنا في الـ friends list، وشايفين حياتنا بالطول والعرض، وقال إيه إحنا فاكرين إنهم بيحبونا ويفرحوا لنا لما بننزل صور و يعلموا لايكات، وهم في الحقيقة نفسهم اللايكات تبقى رصاص يدخل جسمنا من مدفع عيونهم اللي مليانة حقد وحسد.
رسالة أخرى من عقربة سامة لبنت المفروض إنهم صحاب، إنتوا متخيلين اللي وصلنا له؟!
حتى الموت بقى فيه شماتة؟! صدقت يا الله حينما قلت في كتابك الكريم "وَمِنَ النَّاسِ مَن يُعْجِبُكَ قَوْلُهُ فِي الْحَيَاةِ الدُّنْيَا وَيُشْهِدُ اللَّهَ عَلَىٰ مَا فِي قَلْبِهِ وَهُوَ أَلَدُّ الْخِصَامِ" صدق الله العظيم.
ركزوا في الأعداء قبل الصحاب، حافظوا على حايتكم وبيوتكم ومتخلوهاش عريانة بالصور قدام عيون حساد، افرحوا من غير ما تعبروا عن فرحتكم بضحكة عالية، لأن فعلاً الـ walls علي الفيس بوك ليها ودان وعيون كمان، النهاردة عرفت بس دعوة الأمهات اللي كانوا دائماً بيقولوها "روحوا ربنا يرزقوا بولاد الحلال ويكفيكوا شر الصحاب اللي مليانين حسد وقر".