«أبوبكر» و«رشا»: 20 عاماً فى خدمة رواد الموالد

08:15 م | الثلاثاء 21 فبراير 2017

وهبا نفسيهما لخدمة آل البيت من خلال إطعام الفقراء فى الموالد، زوجان من محافظة بنى سويف يتركان منزلهما فى أيام الموالد وينزحان إلى القاهرة ومعهما عدتهما التى يفرشان بها الأرصفة، فى كل موالد آل البيت يظهر الزوجان أبوبكر هاشم، 53 عاماً، ورشا محمد، 42 عاماً، ويبدآن فى طهى اللحوم وتوزيعها على الفقراء ورواد الموالد. على رصيف مسجد السيدة سكينة بشارع الأشراف التابع لحى الخليفة، جلس الاثنان للمشاركة فى إحياء مولد «السيدة سكينة»، عازمين على قضاء 7 أيام أمام المسجد ثم العودة إلى بلدتهما.

يقول «هاشم»: «بنيجى ومعانا الأكل اللى بنسويه فى الشارع وأول ما يخلص المولد بنروَّح، ربنا يكتب لنا الثواب». يحرص الرجل الخمسينى على توريث عمله الخيرى لأبنائه الصغار: «اتعودنا على خدمة آل البيت.. دى الحاجة اللى بعلمها لعيالى عشان لما يكبروا يبقوا بتوع ربنا»، فيما تجلس زوجته مرتدية جلباباً أسود بين «الحلل وقطع الكرشة واللحم»، وتقوم بإعداد وليمة المولد: «شِالله يا أهل البيت».

منذ 20 عاماً و«هاشم» يواظب على هذه العادة، لكنه لا يتحمل وحده تكلفة الأكل: «إحنا بنجيب اللى نقدر عليه والباقى ولاد الحلال كتير بيبعتوا لنا نعمل أكل للغلابة.. واللى بيفيض بعد ما المولد يتفض بناخده معانا البلد وإحنا مروحين»، مضيفاً: «أبويا وجدى ربونا على كده، مفيش شغل أهم من خدمة أهل البيت، دى حاجة بالوراثة عندنا».