«رفعت فكرى»: «باكون فرحان بمنظر الناس وهى بتوزع تمر ساعة الفطار»

10:40 م | الاثنين 12 يونيو 2017

«شهر له طعم خاص فى المجتمع المصرى، يجمع الأسر المصرية، فى وقت فيه مشغوليات وظروف اقتصادية مختلفة ومتنوعة، وأجمل ما فيه الترابط الجميل جداً بين المسيحيين والمسلمين من خلال العزومات بين الاثنين، وبيكون مليان محبة ووئام بين كل المصريين، وانا بعتبره فرصة جميلة أن الناس تقرب من بعض، والأكل مع بعض فيه فرصة لخلق الألفة».. وصف قصير بدأ به القس رفعت فكرى، رئيس لجنة الحوار بمجمع القاهرة الإنجيلى، حديثه لـ«الوطن».

ذكريات جميلة يتمنى القس أن تسود مصر فى كل الأوقات وألّا تقتصر على رمضان فقط: «يكون جميل لو بدأنا من هذا الشهر للتأكيد على وحدتنا وتماسكنا، وخليناها مبادرة نمشى عليها على مدار السنة، ونبعد عن التكفير والتراشق بالألفاظ التى تجرح أى إنسان، لأن هذا يؤدى إلى مناخ سيئ من العلاقات».

أما حى شبرا الذى نشأ فيه، والذى يتميز بكثافته المسيحية، فحكاية أخرى من حكايات المصريين، إذ يذكره بكل فخر: «أيام الطفولة كنا عيال بنلعب مع بعض ونفرح وماكانش حد بيسأل التانى انت ديانتك إيه، وحى شبرا اللى اتولدت فيه بيجمع مسلمين ومسيحيين ويعبر عن أصالة مصر وأصالة المجتمع المصرى، وكنا فى الطفولة نلعب مع بعض بدون التفريق بين العقائد، فاللعب والرياضة بتشيل الحواجز بين الناس.. كانت فترة جميلة، وفرصة للتعاون المشترك، واللعب المشترك، فنحن لا نشاهد شباباً مسيحيين يوزعون البلح والتمر هندى على الناس إلا فى مصر، لأن بلدنا فيه كثافة مسيحية وكثافة مسلمة والاتنين منصهرين فى بعض، وأنا ساعات ببقى ماشى فى الشارع محدش عارف ديانتى، وألاقى الناس بتوزع حاجات ساعة الفطار وبكون فرحان جداً بهذا المنظر».

يصمت الرجل للحظات قبل أن يحذر من تلويث الأطفال بجراثيم التفرقة والتمييز: «خلوا بالكم.. الطفولة ممكن تفسد وبراءتها تفسد والمجتمع بالضرورة سيفسد كذلك، ولا بد أن أولياء الأمور يراعوا هذا، وميقولوش للطفل متلعبش مع ده علشان هو مسيحى أو علشان هو مسلم، ولو حافظنا على الطفولة وبراءة ونقاء الطفولة مش هيكون فيه تعصب، ولازم نبعد عن الخطاب اللى بيخلق تفرقة.