«الكحكة».. من على رؤوس ربات البيوت إلى موضة «دراما رمضان»
شيرين رضا
تسريحة شعر لفتت انتباه الفتيات إلى دراما رمضان، فبعد أن كانت «الكحكة» هى «اللوك» الرسمى لربات البيوت والفتيات بالمنزل، أصبحت الموضة الأشهر على رؤوس النجمات مؤخراً، حيث تألق كثير من النجمات فى الوطن العربى فى الظهور بكحكة الشعر المرفوعة «bun»، التى نالت إعجاب كثير من الفتيات وقررن تقليدها باستخدام الإسفنج والشرابات.
«التسريحة دى كانت منتشرة جداً فى الستينات، نجمات كتير عملتها زمان، ورجعت تانى الموضة بتجدد من نفسها دايماً»، كلمات محمد مرسى، أحد العاملين فى مجال تصفيف الشعر، يعد من أقدم أصحاب الكوافيرات بحى الدقى، والذى وصف تسريحة الـ«bun» بأنها ترجع إلى أصول فرعونية.
وبحسب «مرسى» فإنه باستخدام بعض الخامات البسيطة تستطيع كثير من الفتيات عمل هذه التسريحة بالمنزل: «أهم حاجة عشان تطلع التسريحة دى مظبوطة هى الحشو اللى هيستخدم فيها عشان تكون مرفوعة كويس، فيه بنات بتعملها بالإسفنج أو يدخلوا كذا شراب فى بعض، وفيه دلوقتى تِوَك مخصوصة بتنفذها بسهوله جداً».
أشكال الوجوه الدائرية والصغيرة هى الأنسب لهذه التسريحة، وفقاً لـ«مرسى»، حيث إنها تساعد على منح الوجه إحساساً بالامتلاء والاتساع والكبر: «كل تسريحة بتليق على وشوش معينة، المفروض مش كل موضة تطلع الناس تجرى وراها وتقلدها وخلاص لازم تكون لايقة عليهم وعلى سنهم».
يرى «مرسى» أن تسريحة «الكحكة» ستكون من أهم تسريحات الأطفال فى الفترة المقبلة، وذلك بعد ظهور أكثر من موديل للأطفال: «عندى نسبة الإقبال فى الوقت الحالى على الفورمة دى بنسبة 70% من البنات وهتزيد كمان فى الصيف جداً عشان بتكون مناسبة مع الحر».