مانيش عارف
ما بين الشيبة والشباب
بقيت خايف
وبتخبط وبتشعبط
في آخر الخيط
وبتسند وبتدارى
في ضل الحيط
بقيت مرعوب
وشايف نفسي في مراية
عجوز كركوب
لحق من عمره بس يا دوب
شوية فرح
وحبة جرح
وحتى الضحكة على وشه
بقت مرسومة بالمقلوب
صحابي قالولي يا طيب
لإمتى الحظ هيفارقك
بتجري في عمر ليه سارقك
ما هم عارفين
أكيد شايفين
وطقطق فيا شعر أبيض
في عز التلج كنت زمان
بكون حران
دلوقتي ليه بقيت ببرد
قالولي العمر ده مراحل
ما تقلقشي وتتوتر
ماهو الإنسان أكيد راحل
يا عالم مين يعيش أكتر
يمر العمر وأنينه
يحن شبابي لسنينه
وأقول أنا هجري واتنطط
يصيبني عليل
وأحمد ربي واتشكر
ما أنا فاهم
بإن ده وارد إني أتعب
وكل يوم يزيد تعبي
وليه الدهشة مستغرب
ما أنا عارف
بإن القلب لو عجز
بيطرح شعر لونه أبيض