غضب بين المواطنين بعد اقتراح وزير التموين تقليل حصة الخبز: «هنكفّى عيالنا منين؟»

08:22 م | الاثنين 24 يوليو 2017

تباينت آراء المواطنين حول اقتراح تخفيض حصة الفرد من الخبز المدعم من 5 إلى 4 أرغفة بين الرضا والغضب، ففى الوقت الذى رأى فيه عدد من المواطنين أن الحصة المقررة ليست كافية لتلبية احتياجاتهم اليومية من الخبز المدعم، رأى آخرون أنه قرار صائب خاصة أنهم يبدلون فوارق نقاط الخبز بسلع أخرى وهى ما تلبى احتياجاتهم.

ترفض «أم مصطفى محمد»، البالغة من العمر 55 عاماً، من حى إمبابة، هذا الاقتراح، فعلى حد قولها: «أنا أم لثلاثة أبناء والخمسة أرغفة ما بتكفيش، وبعمل لهم رز ومكرونة عشان نعرف نكمل باقى الأكل بتاع اليوم».

{long_qoute_1}

وعبرت السيدة الخمسينية عن غضبها الشديد بصوت مرتفع: «حرام والله العظيم، كفاية علينا كدا غلاء»، وتابعت: «فيه غلابة كتير والخمسة أرغفة بتكفيهم اليوم بالعافية لما يبقوا 4 هيعملوا إيه؟»، وأكدت أنها تضطر لأخذ جزء من حصة جيرانها من الخبز اليومى، موضحة: «ولادى شباب، شقيانين وتعبانين من شغلهم وبياكلوا كويس، ابنى بياكل 4 أرغفة فى المرة الواحدة أقول له لا متاكلش باقى اليوم عشان هيقللوا العيش؟». فيما قالت منى عاشور، البالغة من العمر 43 عاماً، من حى عابدين: «يعنى الرغيف ده فرق معاهم للدرجة دى؟». وأوضحت «عاشور» أنها لا تصرف حصتها بشكل يومى، مضيفة: «بصرف فى أول الشهر بـ3 جنيه، والباقى باخده فرق نقاط»، وقالت بنبرة يائسة: «اللى هيرسى على الناس هيرسى عليا».

بينما قال هاشم خليل (43 عاماً)، بائع فاكهة فى وسط القاهرة: «هو بقى فيه حاجه بتكفى دلوقتى، بصرف بـ2 جنيه عيش كل يوم أنا وعيالى الـ6، أجيب لهم أكل منين؟». وتابع غاضباً: «إحنا مالناش رأى الاقتراح اتقال، وهينفذوه وكله بعد كدا بييجى على الغلابة اللى زينا».

لم يختلف الحال كثيراً بالنسبة لـ«عبير على» (40 عاماً)، التى أعربت عن انزعاجها بشأن القرار قائلة: «5 أرغفة مش مكفية أمّال لما تدونى 4 أعمل بيهم إيه.. الدولة بتوفر لنفسها على حساب الغلابة فين الرحمة بينا؟». مسئولية عبير كبيرة فهى زوجة لرجل مسن ولا يعمل، وأم لطفلين، بالكاد توفر قوت يومهم حيث أضافت بكلمات ممتزجة بالألم: «معاش جوزى 1150 جنيه مبيكفوناش 10 أيام على بعض.. أنا بفرح لما ولادى يكونوا نايمين عشان ميقولوش إنهم جعانين». واستطردت قائلة: «منظومة الخبز دى ظلمت ناس غلابة كتير من ساعة ما اتعملت».