«فياض».. أول «بائع تين»: خليت الكارو تجيلى هنا بدل ما أروح لها

07:54 م | السبت 29 يوليو 2017

اقتضت العادة أن يخرج المزارعون بالتين الشوكى من أبوزعبل، متوجهين به إلى القاهرة لعرضه على الباعة، وموزعين بعضه على عربات الكارو، ومن ثم يعود بما تبقى معه، لكن محمد فياض، كان أول من جلس بفرشة كبيرة داخل أبوزعبل، ليقلده كثيرون، ومع الوقت اعتاد التجار على القدوم إلى أبوزعبل لشراء الكميات المناسبة لهم، ولأن الرجل الخمسينى ابن المنطقة، فهو شاهد على كثير من المشاكل. من خلفه استقرت ترعة الإسماعيلية، وأمامه عشرات الأقفاص، ومن حوله جلس كثير من الباعة الذين قلدوه، لكنهم جميعاً يعودون إليه إذا ما اختلفوا فى سعر: «أنا بفضل الله كنت أول واحد يقعد على البحر، وخليت الناس هى اللى تجيلى بدل ما أنا أنزل كل يوم القاهرة أبيع» يقولها الرجل مفتخراً بنفسه، ليشهد له بعض الجلوس حوله بالأمر، مضيفاً: «عندى 48 سنة كلها فى المهنة دى، لا عندى صنعة ولا شغلانة غيرها»، معدداً بعض المشاكل التى باتت تهدد زراعة التين الشوكى فى منطقته التى اشتهرت بزراعته، وباتت مهددة بعد توغل المبانى على الأرض الزراعية والرملية التى يزرع بها التين: «الأرض بعد ثورة يناير اتبنى عليها، وكل سنة بتزيد المساحات اللى بتتبنى ومحدش واخد باله» قالها وعلى وجهه علامات الأسى، متمنياً أن تقوم الدولة بالحفاظ على تلك النبتة: «ناس كانت بتأجّر أراضى، دلوقتى مابتلاقيش أراضى تأجرها عشان تزرعها، وبالتالى مفيش تين شوكى بالكم الكبير، وبقينا نجيب من سينا والإسماعيلية والبحيرة». تحتاج الأرض إلى ملح لوريا أو فرنسى، ويبلغ ثمن الجوال 225 جنيهاً، ويحتاج الفدان الواحد 20 جوالاً، وتوضع للأرض تلك الأملاح مرتين فى السنة، فى أولها ومنتصفها: «طبعاً دى تكلفة، وكانت الشيكارة بـ140 السنة اللى فاتت، ولما بنطلب من الجمعيات الزراعية تقول مفيش، فنضطر نشترى من السوق السوداء» قالها «فياض» بعدما باع قفصاً لسيدة تبيع التين، مضيفاً: «فيه بقى بوتاسيوم، والتين بيحتاج منه 3 شكاير للفدان الواحد، وتمن الشيكارة 650 جنيه، يعنى لو عندى 10 فدادين بجيب 30 شيكارة»، متمنياً أن تدعم الدولة تلك الزراعة وتوفر لها احتياجاتها من الأملاح والكيماويات: «دى ثمرة كويسة للبلد، مابتحتاجش مية كتير ولا رش، وممكن نزرع الصحراء كلها بس المشكلة فى المياه، محتاجين نوفر طريقة نسقى بيها الأماكن المتطرفة وإحنا نملا الصحراء تين ونصدره كمان».