الهموم محتاجة مَطرة
والجراح محتاجة خيط
القلوب محتاجه قطرة
مش غناوي وكتر صِيت
الحياة فيها المُخاطرة
مهما رحت ومهما جيت
كل روح يلزمها سُترة
وإنت عمرك ما ارتويت!
الهموم محتاجة مَطرة
والهدوم غرقانة حِبر
القلوب محتاجة قطرة
مش مجادلة وخوف وكِبر
والحياه فيها المُخاطرة
وإنت نفَسك طوله شِبر
وكل روح يلزمها سُترة
ياللي دمك ريحته تِبر
الهموم محتاجة مَطرة
تغسل الحزن ف صِباه
والقلوب محتاجه قطرة
ترجّع الشوف اللي تاه
والحياه فيها المخاطرة
يا اللي خايفين م الحياه
وكل روح يلزمها سُترة
وسُترة العابد ضِياه