«تخيل القاهرة بعد 50 عاما».. فيه تطوير.. مفيش عشوائيات

مجموعة من الشباب المصرى والأمريكى عايشوا العشوائيات فى مصر واقتربوا إلى حد كبير من هموم ساكنيها ومشاكلهم، ولأن كل الحلول المتاحة حاليا ليس بإمكانهم تنفيذها فقد فتحوا المجال أمام خيالهم ليجدوا حلا لمشاكل القاهرة التى استعصت على الحل. «القاهرة من أسفل» هو الاسم الذى اختارته المجموعة لمشروعها، وهو عبارة عن مسابقة «تخيل كيف ستكون القاهرة بعد 50 سنة» وكيف ترى مستقبل التخطيط العمرانى فى مدينتك خلال العقود المقبلة. «أساس المبادرة جاء من مشاركة المواطنين فى المشروع بعيدا عن الروتين الحكومى» هكذا شرح بولا عبده أمين، المتحدث الإعلامى للمشروع: «الفكرة أساسا كانت نتاج دراسات بحثية قام بها شباب أمريكان ومصريون لصالح وزارة التخطيط العمرانى، عشان كده هما قربوا جدا من الواقع المصرى وخصوصا العشوائيات وعاشوا فى القاهرة فترة عشان كده المشروع قائم على القاهرة فقط». هو لا يرى غضاضة فى مشاركة أمريكان فى المشروع: «دول ناس بتفهم يعنى إيه تطوع، وعندهم أفكار ممكن تفيدنا، ليه بقى منستفيدش منهم». المشروع يعانى نقص الإمكانيات وقلة الدعم، ولكنه يبحث عن رعاة للفكرة يسهمون فى نشرها على نطاق واسع، «لو لاقينا حد يدعمنا الفكرة هتكبر ومش هيكون فى عشوائيات أبدا فى مصر كلها». الجوائز المقدمة للأفكار الفائزة فى مسابقة «تخيل القاهرة» لم تحدد قيمتها بعد كما يؤكد المتحدث باسم المشروع «كل الأفكار الفائزة سيتم وضعها فى إطار واحد وسيتم تقديمها لوزارة التخطيط العمرانى فى حال عدم وجود داعم لتفيذ هذه الأفكار». «الناس مش قادرة تصدق الحكومات عشان كده لازم أى تخطيط يكون نابع من المواطنين أنفسهم، عشان ينجح، ولا يكون على حساب الفقراء والناس اللى ملهاش صوت» على حد تعبير بولا عبده الذى أكد أن «المشروع فى مجمله فكرة جديدة من الناس ولهم.. عشان كده إن شاء الله هينجح».