مسمط يحمل الخير لأهالى «الناصرية»:من لا يملك ثمن الطعام فليطلبه مجاناً

07:23 م | الاثنين 13 نوفمبر 2017

جملة تلفت انتباه المارة كُتبت على أحد المطاعم بمنطقة الناصرية، حرص صاحب المطعم والعاملون فيه على تعليقها أمام الخزينة المطلة على الشارع: «من لا يملك ثمن الطعام.. فليطلبه مجاناً». الفكرة بدأت عندما رأى صاحب المسمط على مواقع التواصل الاجتماعى أن هناك مطعماً سعودياً يقدم الطعام مجاناً لكل من لا يملك ثمنه، فحث العاملين على العمل بنفس المبدأ وهو ما لاقى قبولاً بينهم: «إحنا أولى؛ الناس هنا غلابة ربنا يكون فى عونهم».

يقف أشرف فتحى، عامل بالمحل، فى انتظار الزبائن، يأتيه بالفعل من يطلب طعاماً بدون مقابل، ولكن لـ«أشرف» نظرة وخبرة فى تحديد المحتاج من عدمه: «إحنا شغالين مسمط بمنطقة شعبية، ناس كتير ممكن تطلب، لكن مش كل اللى بيطلب بيكون محتاج، وطبعاً إحنا عندنا وجهة نظر فى اللى قدامنا، لأن فيه ناس بتنصب وبيمشوا فى السكة دى». يعمل «أشرف» فى مسمط الناصرية منذ عشرات السنوات: «أفتكر زمان خالص كنا نجيب الكليو بـ35 قرش، ونص جنيه، دلوقتى بنجيبه بـ40 و50 جنيه»، أما الطلب فيبيعه حاليا بالثمن الذى يطلبه الزبون.

يتمنى العاملون أن يعمل الناس بمبدأ «ما نقص مال من صدقة»، وألّا يعمل التجار بطريقة جشعة: «لازم كلنا نحس ببعض، الحالة الاقتصادية صعبة على الكل والناس كتر خيرهم، ومساعدة الناس بتجلب راحة نفسية، ولو كلنا ساعدنا بعض مش هنلاقى لا حد جعان ولا حد محتاج، خلص الكلام».