حاتم هزاع حاتم هزاع شاعر
السبت 16-12-2017 | PM 05:45

حاتم هزاع

رسام بيرسم بالكلام أحلى غناوى بلدتى

يحكى وجعيتى تترسم بحروف منى

تطلع آهاتى فى أغنيات تحكى حكايات

على إيده كانت غنوتى

وبغنوته أنا ياما نزلت دمعتى

حكايات كتيرة اتجسدت

بحروف بسيطة اتلونت

فرح وعذاب

ضحك وبكى

بلياتشوا ساكن كلمته

وف دمعته سكت الكلام

......

نرجع زمان

على سطح بيتنا

وسط الصحاب متجمعين

لمة شقاوة

كلها أحلام بريئة لبكرة اللى مات مننا

لمة صحابى الطيبين

مرسومة شوق ويا الحنين

كلمة حبيب

شوقه لهيب

ودى قصة تانية عندنا

مرسومة بحروف الكلام

مترتبة ومتظبطة

تحكى حكاوى العاشقين

ترسم ألم وتقول شجن

تحكى اللى كان

أيام شقى وأيام صفى

محفورة جوه البيت آهات

وصاحبنا ناوى بقول لنا

أحلى غناوى عمرنا

لوحة كلام تحكى الزمان

تشرح توضح عمرنا

رسام بيرسم بالحروف

أحلى حكاوى عننا

قصائد متعلقة

تعليقات الفيس بوك

القصائد الأكثر مشاهدة

عاجل