بسبب سوء خدمة الإنترنت.. رواد مواقع التواصل الاجتماعي غاضبون
الإنترنت
اجتاح الغضب مواقع التواصل الاجتماعي، بعد سوء أداء خدمة الإنترنت التي شهدتها مصر خلال الأيام القليلة الماضية.
وأعلنت شركة "المصرية للاتصالات" على حسابها بموقع التواصل الاجتماعي "تويتر"، عن وجود مشكلة تؤثر حاليًا على كفاءة خدمة الإنترنت في مصر وبعض الدول المجاورة.
كما أوضحت أن الشركة ستستعيد الخدمة بشكل كامل تدريجيًا خلال الأيام القليلة المقبلة.
وتسببت هذه المشكلة في غضب عدد كبير من رواد مواقع التواصل الاجتماعي، مؤكدين أن الخدمة سيئة منذ أكثر من شهر.
ويرصد لكم الوطن أبرز التعليقات على سوء خدمة الإنترنت:
قال طارق عصام: " حسبي الله ونعم الوكيل فيكم فلوسنا كلها رايحة على الأرض من غير خدمة ولا مقابل للفلوس أنا عندي مشكلة بقالها شهر، الخدمة زي الزفت وده رقم الشكوى 40743449 في واحد اتصل المفروض إنه قالي جاي زيارة ومجاش ولا اتصل ممكن أعرف إيه الحل وإيه التعويض المناسب اللي هيتقدملي؟".
وقال عمرو ماهر: "طب أنا النت مفصول خالص من يوم 12 وعملت شكوى ولا أي حد اهتم أعمل فيكوا اية ؟".
وعلق علي هشام: "أنا بقالي أسبوعين عندي مشكلة فالخدمة تقطع أكثر من 150 مرة فاليوم مع ربع السرعة الأصلية وبطئ تصفح وتحميل مفيش ألعاب أونلاين بتشتغل مش عارف أعمل أبحاث للامتحانات بتاعتي هيكون في تعويض ولا هتعملو من بنها وتدفعونا فلوس إشتراك كامل واصلا مفيش خدمة مستقرة موجودة؟".
وقالت جيهان أدهم: "بسببكم شغلنا اتعطل ولغينا شغلنا وخسرنا 10000 جنيه ده غير صورتنا اللي باظت إنتوا فاشلين وأفشل خدمة عملاء ومش حافظين غير اﻹسبليتور متركب".
وقال شلبي عبدالله: "أنا مشترك في نظام ميجا بلس 16ميجا ومش جاي منهم غير 7 والكلام ده من بداية شهر 12 أعمل إيه أنا دلوقتي ولما كلمت الشركة قالولي غير سللك التليفون وعملت كده وبردو المشكلة ماتحلتش".
وقال هاني الشحات: "للأسف الشديد الكلام غير صحيح، النت سيظل سئ للغايه لأنهم مازالوا يعملوا بالأسلاك النحاسية في التوصيل والعالم كله يستعمل الألياف الضوئية".
وقال سقراط: " طب ومشكلة خطي الأرضي اللي مأثرة على النت اللي مستمرة من أربع شهور وأكتر مش ناوين تخلوها خلال ايام قليلة؟!".